ჩინეთში შენდება მომავლის ქალაქი, სადაც ეპიდემიის დროს ცხოვრება უსაფრთხოდ იქნება შესაძლებელი. ქალაქის მშენებლობა Guallart Architects-ის არქიტექტურულმა ბიურომ დააპროექტა. ინფორმაციას Arch Daily ავრცელებს.

მომავლის ქალაქი პეკინიდან 100 კილომეტრის მოშორებით შენდება. „ჩვენ ამის შემდეგ ვეღარ დავაპროექტებთ და ავაშენებთ ქალაქებს ისე, რომ თითქოს არაფერი მომხდარა, ჩვენ პროექტი თვითიზოლაციის დროს მოვამზადეთ, ამიტომ გავითვალისწინეთ ყველა ასპექტი, რაც კარანტინის დროს ჩვენს ცხოვრებას გააუმჯობესებს“, - აცხადებენ არქიტექტურულ ბიუროში.

ამ ქალაქში განლაგებული სახლების სახურავებზე გათბობის სისტემა დამონტაჟდება. სახლი მიიღებს ენერგიას მზის ელემენტებითაც. სახლის პირველ სართულზე განთავსდება 3D-პრინტერები, რითაც ნარჩენების გადამუშავების ორგანიზება მოხდება.

სახლები ხის მასალისგან აიგება. ქალაქის ყველა ნაწილი მაქსიმალურად იქნება ფუნქციებით დატვირთული. აშენდება ოფისები, აუზები, მაღაზიები, ბაზრები, საბავშვო ბაღები, სახანძრო და სხვა ობიექტები.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ მიიჩნია. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.