ვფიქრობ, რომ ეს არის წმინდა ადამიანური ტრაგედია. მათი შეხედულება შეიცვალა სააკაშვილზე, ჩემი შეხედულება შეიცვალა მათზე,- ასე ეხმიანება პარლამენტის პირველი ვიცე-სპიკერი გია ვოლსკი მიხეილ სააკაშვილის, გუბაზ სანიკიძის და ვალერი გელბახიანის შეხვედრას და აცხადებს, რომ საზოგადოება გუბაზ სანიკიძისგან და ვალერი გელბახიანისგან ღირსეულ ნაბიჯებს ელოდა.

მისი თქმით, არ ფიქრობს, რომ მათი ერთობა მნიშვნელოვანი ძალა შეიძლება იყოს „ქართული ოცნების” წინააღმდეგ.

„მართალი გითხრათ, ცოტა გულდაწყვეტაც მაქვს, რადგან არიან ადამიანები, რომელთა მხრიდან საზოგადოება ელის ღირსეულ ნაბიჯებს, თუნდაც გელბახიანის მხრიდან, რომელიც იყო ბადრი პატარკაციშვილის საარჩევნო შტაბის ხელმძღვანელი. მე ვერ გეტყვით, რომ ბადრი პატარკაციშვილს, როგორც პილიტიკოსს მხარს ვუჭერდი, ეს ასე არ არის, ან გუბაზ სანიკიძე, თქვენ თვითონ იხილეთ, რა პოზიციით გამოირჩეოდა სააკაშვილის მიმართ, მაგრამ არ მიკვირს რატომღაც. ვფიქრობ, რომ ეს არის წმინდა ადამიანური ტრაგედია. მნიშვნელოვანი ძალა არ შეიძლება იყოს და ვერც განვიხილავ. მათი შეხედულება შეიცვალა სააკაშვილზე, ჩემი შეხედულება შეიცვალა მათზე,”- განაცხადა გია ვოლსკიმ.