როგორც კატალონიური Sport-ი იუწყება, "ბარსელონამ" ამსტერდამის "აიაქსის" ნახევარმცველ ფრენკი დე იონგთან შეთანხმებას მიაღწია და მასთან ხუთწლიან კონტრაქტს გააფორმებს.
ახლა ჯერი კლუბებზეა, რომლებიც სატრანსფერო ფასზე უნდა შეთანხმდნენ. "აიაქსი" 75 მილიონ ევროს ითხოვს, კატალონიელები კი 60 მილიონის გადახდაზე არიან თანახმა.
როგორც გამოცემა წერს, ფეხბურთელის აგენტი სხვადასხვა კლუბის წარმომადგენლებს შეხვდა, მათ შორის "მანჩესტერ სიტის", მიუნხენის "ბაიერნის" და პსჟ-ს, თუმცა პრიორიტეტი დე იონგის სურვილი იყო, რომელსაც "ბარსელონაში" თამაში სურს.
Sport-ის ინფორმაციით, ტრანსფერის შესახებ ოფიციალური ცნობა მას შემდეგ გავრცელდება, რაც კლუბები ფეხბურთელის ფასზე შეთანხმებას მიაღწევენ.
ფრენკი დე იონგი 21 წლისაა და ერედივიზიონში 39 მატჩი აქვს ჩატარებული, ის ჰოლანდიის ეროვნული ნაკრების წევრია.
