თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი ბრიტანეთის საელჩოში გია ბარამიძისა და გიგა ბოკერიას დახურული შეხვედრის ფაქტს გამოეხმაურა. იგი ევროპელი ელჩების მხრიდან ბოლო დროს ჩამოყალიბებულ პრაქტიკაზე საუბრობს და აცხადებს, რომ შორსაა აზრისგან, რომ საელჩოში ოპოზიციის წარმომადგენლებს 4 ოქტომბერს კანონის შესაბამისად მოქცევისკენ მოუწოდეს.

„ის პრაქტიკა, რაც ბოლო დროს ჩამოყალიბდა ევროპული ქვეყნების საელჩოების მხრიდან, გვაფიქრებინებს იმას, რომ ისინი ამ მოძრაობის ავანგარდში და ამ დესტაბილიზაციის ხელის შემწყობები არიან. შორს ვარ იმ აზრისგან - არც ისეთი გულუბრყვილო ვარ, რომ ბრიტანეთის საელჩომ მოუწოდა, 4 ოქტომბერს კანონისა და კონსტიტუციის შესაბამისად მოიქცნენ. ასე რომ, ეჭვები საფუძვლიანია იმიტომ, რომ ვუყურებთ ბოლო პრაქტიკას, როგორ იქცევიან ევროპელი ელჩები საქართველოში და როგორ არღვევენ ვენის კონვენციას ყოველ ფეხის ნაბიჯზე”, - განაცხადა თენგიზ შარმანაშვილმა.

„ქრონიკამ“ ბრიტანეთის საელჩოში გია ბარამიძისა და გიგა ბოკერიას ფარული შეხვედრის ფაქტი დააფიქსირა. ბარამიძე ამბობს, რომ ბრიტანეთის საგარეო საქმეთა სამინისტროს წარმომადგენელს 4 ოქტომბრის აქციაზე ესაუბრა.