ფაქტია, ბოროტი ინტერესი, რასაც ჰქვია ჩვენი სახელმწიფოს პროქსი სახელმწიფოდ გამოყენება, ძალაშია, - განაცხადა მედიასთან ფრაქცია „ქართული ოცნების" თავმჯდომარის პირველმა მოადგილემ, ირაკლი კირცხალიამ.
მისივე თქმით, არ აქვს მნიშვნელობა, რა ერქმევა ფონდს, მთავარია, თანხა მოდის იმ აგენტურული ქსელისთვის, რომელიც აქ ე.წ. ენჯეოებისა და კოლექტიური „ნაცმოძრაობის“ სახით მოქმედებს.
„არ აქვს მნიშვნელობა, USAID-ი იქნება თუ ნებისმიერი სხვა სახელი იქნება, მთავარია, თანხა მოდის იმ აგენტურული ქსელისთვის, რომელიც აქ მოქმედებს ე.წ. ენჯეოებისა და ვითომ პარტიების სახით, მხედველობაში მაქვს კოლექტიური „ნაცმოძრაობა“. ფაქტია, რომ ბოროტი ინტერესი, რასაც ჰქვია ჩვენი სახელმწიფოს პროქსი სახელმწიფოდ გამოყენება, ასევე პროქსი ომის საწარმოებლად, ძალაშია, აქტუალურია და აქტუალური იქნება, ვიდრე დამანგრეველი ომი არ დამთავრდება ევროპის კონტინენტზე, კონკრეტულად, რუსეთ-უკრაინის ომი“, - აღნიშნა ირაკლი კირცხალიამ.
საქართველოში მუნიციპალური არჩევნების წინ, დიდი ბრიტანეთის საგარეო საქმეთა სამინისტრო საგრანტო პროგრამას აცხადებს, რათა „ხელი შეუწყოს 2025 წლის ოქტომბერში დაგეგმილი საქართველოს მუნიციპალური არჩევნების ეფექტურად ჩატარებას“.
