ჩვენი კომისიის მანდატი მიმდინარე კვირაში გაფართოვდა, თუმცა მანამდე „ქართული ოცნების“ უმრავლესობის ლიდერმა გააკეთა განცხადება ამის შესახებ. კომისიის მანდატი მანამდე ჩერდებოდა 2012 წელზე, - განაცხადა გადაცემა „იმედი LIVE“-ში პარლამენტის დროებითი საგამოძიებო კომისიის თავმჯდომარემ, პარლამენტის ვიცე-სპიკერმა თეა წულუკიანმა.

მისი თქმით, ახლა აქვთ უფლებამოსილება იმისათვის, რომ დღევანდელ დღემდე შეაფასონ სხვადასხვა პოლიტიკური პირის საქმიანობა თუ გადაწყვეტილებები და სწორედ აქედან გამომდინარე შევადგინეს პირველადი გეგმა იმისა, თუ გაფართოებული მანდატის პირობებში პოლიტიკური თანამდებობის პირებიდან ვისი მოსმენაა შესაძლებელი და საჭირო.

„მათთან შეტყობინების პროცედურა უკვე დაწყებულია და ესენი არიან: ბატონი ნიკა მელია, ბატონი ნიკა გვარამია, ბატონი გიორგი გახარია, ბატონი გიორგი კანდელაკი, ბატონი გიორგი თარგამაძე, ბატონი ზურა გირჩი ჯაფარიძე და იყო ბატონი გივი თარგამაძეც, რომელიც დღეს არ მობრძანდა. თუმცა ბატონი გივი უფრო 2012 წლამდე მანდატის პირობებში უნდა გამოგვეკითხა, აგვისტოს ომთან დაკავშირებით. მათ შორის იმიტომ, რომ ის 8 წლის განმავლობაში იმ საპარლამენტო კომიტეტს მართავდა „ნაციონალური მოძრაობის“ პირობებში, რომელსაც უსაფრთხოების, უშიშროების საკითხები ებარა.

ამ პირების დაბარების პროცედურა უკვე დაწყებულია. მინდა აღვნიშნო, რომ 99% ამ პირებიდან ან დედის ეფარება, როდესაც ფელდიეგერი მიდის, როგორც წესი დედა გამოდის კარებთან და ჩემი შვილი აქ არ ცხოვრობს, იძახის. ეს ის კაცები არიან, რომლებიც ხელისუფლებაში რომ იყვნენ მაშინ ატერორებდნენ ხალხს, მაგრამ როდესაც კითხვა უნდა დაუსვა აბსოლუტურად უწყინარ პირობებში, პარლამენტში, დედას ეფარებიან უკან. ანდა უბრალოდ იმალებიან, სახლში აღარ მიდიან, სამსახურში როცა მიაკითხავს „საქართველოს ფოსტის“ წარმომადგენელი, სამსახურის კარს არ უღებენ და მოკლედ ძალიან გაჭირვებულ მდგომარეობაში არიან. არის შემთხვევებიც, როდესაც უარს არ ამბობენ და ვფიქრობთ, რომ ჩვენ საინტერესო გამოკითხვები გვაქვს წინ“, - აღნიშნა თეა წულუკიანმა.