იკვეთება ის, რომ სააკაშვილს, მერაბიშვილსა და კეზერაშვილს, მაშინდელ პოლიტიკურ თანამდებობის პირებს მიზნად ჰქონდათ, რომ რაც შეიძლება მეტი მშვიდობიანი მოქალაქე ჩარჩენილიყო კონფლიქტის, ომის არეალში და რაც შეიძლება მეტი მსხვერპლი ყოფილიყო, - განაცხადა გადაცემა „იმედი LIVE“-ში პარლამენტის დროებითი საგამოძიებო კომისიის თავმჯდომარემ, პარლამენტის ვიცე-სპიკერმა თეა წულუკიანმა.

მისი თქმით, ამის მიზანი იყო ის, რომ შემდეგ ვიღაცას ეთქვა, მათ შორის სააკაშვილს, რომ „აი, ხომ ხედავთ რუსეთი დარჩა თითივით მარტო, გაგვინადგურა მოსახლეობა, რასაც რუსეთი რასაკვირველია არ მოერიდებოდა“.

„ჩვენ ვსაუბრობთ იმაზე, თუ რატომ გაწირეს საკუთარი მშვიდობიანი მოქალაქე, რატომ დასჭირდა ავნევის გამგებელს, ბატონ გიორგი კაპანაძეს, რომ თვითონ, იყო რა თავადვე მიტოვებული თბილისის ცენტრალური ხელისუფლებისგან, თავის თავზე აეღო ახალგაზრდა ქალებისა და ბავშვების გამოყვანა. მან ახსნა რატომ აიღო თავის თავზე ეს ყველაფერი. სოფლის გამგებელი ჩააყენეს ისეთ მდგომარეობაში, რომ ჯერ ერთი მიატოვეს, ინფორმაცია არ მისცეს, ასევე იქაური დროებითი ადმინისტრაციის სოციალური უზრუნველყოფის მინისტრს თამაზ ბესტაევს, რომელიც იქაური ადგილობრივი ხელისუფალი იყო, ინფორმაცია არ მისცეს, მიატოვეს და შემდეგ ამ პირებს მოუწიათ არჩევანი. მოხუცი ქალები დარჩით, პირველ ეტაპზე გამოვიდნენ ახალგაზრდა ქალები იმიტომ, რომ იცით, როდესაც ომში შემოდის მტრული ძალა, პირველ რიგში ერჩის ახალგაზრდა ქალებსა და ბავშვებს.

ადამიანებს მოუწიათ არჩევანის გაკეთება, პირველ რიგში ბავშვები, შემდეგ ახალგაზრდა ქალები და შემდეგ უკვე ბატონმა გიორგი კაპანაძემ ისიც შეძლო, რომ მოხუცებიც გამოიყვანა, ვინც გამოსვლას დათანხმდა. კითხვა ისმის რატომ? დასვამ თუ არა ამ კითხვას, შენ ხარ რუსი. მიუხედავად ამისა, ჩვენ ამ კითხვების დასმას გავაგრძელებთ იმიტომ, რომ ძალიან თავხედდება ყველა პოლიტიკოსი და პოლიტიკური ძალა, როდესაც მას ისტორია არ აძლევს შეფასებას ფაქტებზე დაფუძნებულს. ჩვენ არ ვართ ის თაობა, რომელმაც რაიმე კონკრეტული წვლილი შეიტანა 90-იანი წლების პროცესში იმიტომ, რომ ჩვენ მოზარდები ვიყავით 14-15 წლის, მაგრამ ჩვენ რეალურად მძიმე წლები გამოვიარეთ იმის გამო, რაც უფროსმა ადამიანებმა გადაწყვიტეს და გააკეთეს. ის მოვლენები რომ სწორად შეფასებულიყო ვინმეს მიერ, შესაძლებელია სააკაშვილი საერთოდ ვერ მოსულიყო ხელისუფლებაში. ამიტომ ამის პრევენცია უნდა მოხდეს“, - აღნიშნა თეა წულუკიანმა.