პირდაპირი ინვესტიციების რუსული ფონდის ხელმძღვანელი კირილ დმიტრიევი ვაშნგტონში აშშ-ის პრეზიდენტის, დონალდ ტრამპის სპეციალურ წარმომადგენელს ახლო აღმოსავლეთში, სტივ უიტკოფს და სხვა ოფიციალურ პირებს შეხვდა. ინფორმაციას Reuters-ი ავრცელებს.

როგორც სააგენტოს მიერ გავრცელებულ ინფორმაციაშია აღნიშნული, ჯერჯერობით უცნობია, თუ რა განიხილა დმიტრევმა ამერიკელებთან.

„ტრამპის ადმინისტრაცია აგრძელებს ზეწოლას რუსეთსა და უკრაინაზე იმისთვის, რომ ცეცხლის შეწყვეტაზე შეთანხმდნენ“, - ციტირებს Reuters-ი ანონიმურ წყაროს.

აღსანიშნავია, რომ დმიტრიევი არის რუსეთის პრეზიდენტის, ვლადიმერ პუტინის ახლო მრჩეველი. ის მიმდინარე წლის თებერვალში სხვა რუს ჩინოვნიკებთან ერთად საუდის არაბეთში ამერიკულ მხარესთან მოლაპარაკებებს აწარმოებდა.

დმიტრევი არის ყველაზე მაღალი რანგის რუსი ოფიციალური პირი, რომელიც 2022 წელს რუსეთის უკრაინაში ფართომასშტაბიანი შეჭრის შემდეგ, ამერიკაში ვიზიტით ჩავიდა.

ცნობისთვის, აშშ-მა დმიტრიევს სანქციები დროებით მოუხსნა, რათა მას ამერიკაში ვიზის აღებისა და ჩასვლის შესაძლებლობა ჰქონოდა.