ფორმა, რომელიც ვნახეთ, არის ყოვლად მიუღებელი, თუნდაც იმიტომ, რომ არ ვიცი, იმ ადამიანებს, რომლებიც შემდეგ შემოდიოდნენ და გადაცემაში იღებდნენ მონაწილეობას, ვინ არჩევდა და ვინც მათ არჩევდა, თავად ვის მიერ იყო შერჩეული, – ამის შესახებ საზოგადოებრივი მაუწყებლის სამეურვეო საბჭოს წევრმა, გიორგი იაკობაშვილმა საქართველოს პირველი არხის გადაცემაში „დღის თემა“ განაცხადა.

„თუ ყოველდღე მოდის, დავუშვათ, 100-150 ადამიანი. დავუშვათ, დღეს 600-700 ადამიანი იყო მოსული. ხვალ შეიძლება, სულ სხვა ჯგუფი მოვიდეს, სულ სხვა პრობლემა დააყენოს და სულ სხვა პრეტენზია ჰქონდეს საზოგადოებრივ მაუწყებელთან. იმიტომ, რომ იდეალური არავინ არის და ყველას შეიძლება, რაღაც მოთხოვნა გაუჩნდეს, ხომ ასეა? ეს ბაკქანალია რომ არ მოხდეს, ამ გაუგებრობებს და ამ ველურობას არ ჰქონდეს ადგილი, ზუსტად ამისთვის არსებობს ბორდი და მენეჯმენტი, რომელიც მშვენივრად მუშაობს; ამისთვის არსებობენ ჟურნალისტები და მინდა, ჩემი პატივისცემა კიდევ ერთხელ დაგიდასტუროთ; მინდა, კიდევ ერთხელ აღვნიშნო, რომ მშურს თქვენი ნერვების, როგორც უმკლავდებოდით ამ პროცესებს. არის მენეჯმენტი და არის ბორდი. მე ვერაფერს გეტყვით ამასთან დაკავშირებით, რადგან ხვალ შეიძლება, დოიაშვილთან მივიდეს ადამიანების გარკვეული ჯგუფი და მოსთხოვოს, მე არ მომწონს შენი რეპერტუარი და მოდი, რეპერტუარი იყოს ასეთი. ან უთხრას, მოდი, დადგი „ოტელო“, ოღონდ, ბოლოს დეზდემონამ დაახრჩოს ოტელო, რადგან ეს ხალხის მოთხოვნაა. მე არ ვიცი, ვინ ხალხზეა საუბარი და რა წარმომადგენლობაზეა საუბარი. ამ ქვეყანაში არის კონსტიტუცია, არის კანონი, ტარდება არჩევნები, არჩევნების შდეგად ირჩევა პარლამენტი, პარლამენტი ამტკიცებს ბორდს, ბორდი ირჩევს გენერალურ დირექტორს, გენერალურ დირექტორს შემდეგ მოჰყავს ჟურნალისტები, თანამშრომლები, იწყებენ მუშაობას და საზოგადოება ამას აფასებს. ამ საზოგადოების წევრი, მათ შორის, ვარ მეც. ვიდრე ბორდის წევრი ვიქნებოდი, ვიყავი მაყურებელი და ჩემთვის მაგალითად, ბევრჯერ დაურეკავთ და უთქვამთ პრეტენზიები, მაგალითად ვიტყვი, „რეალურ სივრცესთან“ დაკავშირებით, ნინო ზაუტაშვილთან დაკავშირებით, რომ ეს მიკერძოებული, ცალმხრივი და არაობიექტური გადაცემა რატომ უნდა იყოს საზოგაოებრივი მაუწყებლის ეთერში. ბევრჯერ დაურეკავთ და პრეტენზიები ჰქონიათ 18-საათიან „მოამბესთან“ დაკავშირებით. გამიგებთ, რასაც გეუბნებით. ასე რომ, ეს არ არის ცალმხრივი პროცესი. ეს არ არის მარტივი პროცესი და უნდა ვიყოთ კანონის ჩარჩოებში“, – განაცხადა იაკობაშვილმა.

მისი თქმით, გამოხატვის თავისუფლება მნიშვნელოვანია, თუმცა არსებობს კანონის ჩარჩო, რომლის ფარგლებსაც არ უნდა გავცდეთ.

„მე მესმის, გამოხატვის თავისუფლება რომ მნიშვნელოვანია, მაგრამ სტვენით, წივილ-კივილით, გინებით და შემოვარდნის მცდელობით ვერაფერს გამოხატავ, გარდა საკუთარი უზრდელობისა. აი, ესაა ჩემი სათქმელი“, – განაცხადა იაკობაშვილმა.

გია იაკობაშვილმა მზია ამაღლობელთან დაკავშირებითაც ისაუბრა.

„როცა მეუბნებიან, გამოხატე სოლიდარობა მზია ამაღლობელის მიმართ, მე უბრალოდ, მაინტერესებს, გამოვხატო მის მიმართ, როგორც ჟურნალისტის მიმართ სოლიდარობა, თუ მის მიმართ, როგორც მოძალადის მიმართ სოლიდარობა. იმიტომ, რომ სილის გარტმა ჩვეულებრივი ძალადობა იყო და ეს არის დასჯადი. მერწმუნეთ, დავუშვათ, მე გავარტყა სილა პოლიციელს კი არა, ნებისმიერ მოქალაქეს და გამაწესონ იქ, სადაც არის ახლა მზია ამაღლობელი. არც ერთი მათგანი ხმას არ ამოიღებს ჩემ დასაცავად“, – განაცხადა იაკობაშვილმა.

#დღისთემა საზოგადოებრივი მაუწყებლის სამეურვეო საბჭოს წევრების პოზიცია - თამილა დოლიძე, გიორგი იაკობაშვილი, გიორგი კოხრეიძე, ბონდო მძინარაშვილი
მსგავსი: #დღისთემა საზოგადოებრივი მაუწყებლის სამეურვეო საბჭოს წევრების პოზიცია - თამილა დოლიძე, გიორგი იაკობაშვილი, გიორგი კოხრეიძე, ბონდო მძინარაშვილი
გადაცემის წამყვანმა სტუმარს ჰკითხა სახალხო დამცველის განცხადებების შესახებ, რომ მზია ამაღლობელის მიმართ გამოყენებული აღკვეთის ღონისძიება არაადეკვატურია, რაზეც გია იაკობაშვილმა უპასუხა „რას ნიშნავს არაადეკვატურია? მაშინ, მაჩვენოს კანონის მუხლი, რომლითაც შეიძლება, გავამრთლო ჟურნალისტი, როდესაც ის ძალადობს და შემიძლია, არ გავამართლო დავუშვათ, ნებისმიერი მოქალაქე, რომელიც ძალადობას სჩადის“.

თამთა სანიკიძის შეკითხვაზე, რას იტყვის იმ პარალელებთან დაკავშირებით, რაზეც საუბარია, რომ ამ დრომდე არ არის გამოძიებული საქმეები და იდენტიფიცირებულიც კი არ არიან სამართალდამცველები, რომლებმაც მოქალაქეებზე და მათ შორის, მედიის წარმომადგენლებზე იძალადეს, გია იაკობაშვილმა აღნიშნა, რომ ამაზე პროტესტს თავადაც გამოთქვამს.

„ამაზე პროტესტს მეც გამოვთქვამ და მინდა, სოლიდარობა გამოვხატო იმ ადამიანების მიმართ, ვისზეც პოლიციამ იძალადა. ამ შემთხვევაში მე სოლიდარობას უფრო იმ პოლიციელს გამოვუხატავ, ვისზეც ჟურნალისტმა იძალადა. აქ ჩვენ ხომ ძალადობა უნდა დავგმოთ და არა პროფესიული ნიშნით შევხედოთ, ვის გამოვუხატოთ სოლიდარობა?! რაც შეეხება მზია ამაღლობელის შიმშილობას, ჩემს თვალში ეს უფრო რაღაც შანტაჟს ემსგავსება. აი, თუ თქვენ მე ახლა არ გამომიშვებთ და თქვენ თუ ახლა ჩემს ძალადობას არ გაამართლებთ, მე თავს მოვიკლავ. ეს არის შანტაჟი. კი, დარწმუნებული ვარ, ნანობს, მაგრამ ეს სინანული მან ალბათ, ხმამაღლა უნდა გამოხატოს. ამას ველოდებით და ეს იქნება ის ნაბიჯი, რომელსაც ის გადმოდგამს, რომელსაც კანონი ელოდება, რომელსაც საზოგადოება ელოდება. საზოგადოება ჩვენც ხომ ვართ, მარტო ისინი ხომ არ არიან, გარეთ რომ დგანან და უსტვენენ? მარტო ის ხომ არ არის სამოქალაქო აქტივისტი, ეკა გიგაური. მარტო ის ხომ არ არის ცნობადი სახე, დავუშვათ, დავით დოიაშვილი და მარტო თვითონ ხომ არ არიან ადამიანები? აქ ხომ ადამიანები ვართ? ჩვენ ყველას გვეცოდება, ადამიანი ციხეში რომ იჯდეს, მაგრამ მზია ამაღლობელს დღეს იცავენ ისინი განსაკუთრებით და მომიწოდებენ, სოლიდარობა გამოვხატო, ვინც გუშინ და გუშინწინ „იმედის“ გადამღებ ჯგუფს 7 ნოემბერი უსურვა. ეს ორმაგი სტანდარტი არ არის, ეს უბრალოდ ამაზრზენია. ყველაფერს თავისი სახელი თუ არ დავარქვით, თუ რაღაც დეკლარირებული ზრდილობა, დეკლარირებული პოლიტკორექტულობა იქნება და არ იქნება გულწრფელობა, არც შედეგი იქნება და არც საზოგადოება შედგება. ჯერჯერობით იმიტომაც ვერ შევდექით ბოლომდე საზოგადოებად“, – განაცხადა გიორგი იაკობაშვილმა.