„ნაპოლის“ მთავარმა მწვრთნელმა ანტონიო კონტემ „მილანთან“ მატჩის (2:0) შემდეგ კომენტარი გააკეთა.
როგორც მან თქვა, ისინი არ გაურბიან იმ ფაქტს, რომ გუნდს სკუდეტოს მოგების ამბიცია აქვს, მაგრამ ყველაფერს რეალურად უყურებენ:
„აქ არავინ იმალება, ჩვენს თავს საზღვრებს არ ვუწესებთ, უბრალოდ რეალურად ვუყურებთ ყველაფერს და ვნახოთ, სეზონის ბოლოს რა იქნება. 10 ტურის შემდეგ, ჩემი აზრით, წარმოუდგენელი შედეგი გვაქვს.
მუშაობა გრძელდება, სეზონის წინ ყველა გუნდს აქვს მიზანი და ჩვენი მიზანი ევროტურნირებზე დაბრუნებაა, მაგრამ 5-6 კონკურენტიც გვყავს. თავმდაბლები უნდა ვიყოთ, მნიშვნელოვანი 3 ქულაა. სეზონის წინ არავის წარმოედგინა, რომ 10 ტურში 25 ქულა გვექნებოდა მას შემდეგ, რაც გასულ სეზონში მოხდა.
ყველა ერთად უნდა გავიზარდოთ, განსაკუთრებით მენტალურად, უფრო მაღალი მოთხოვნები უნდა გვქონდეს. ამ თვალსაზრისით ვმუშაობთ. კიდევ უფრო უკეთ შეგვიძლია. „სან სიროზე“ ვითამაშეთ, არა ჩემი სახლის ახლოს მოედანზე... ვიცი, ეს სტადიონი რა ემოციურ გავლენას ახდენს მეტოქე გუნდებზე. „სან სირო“ ფეხბურთის სახლია, აქ მოსვლა, „მილანთან“ გამარჯვება მორალურად გაგვაძლიერებს და მეტ თავდაჯერებაც მოგვცემს. ვიცით, რომ გვაქვს საზღვრები, მაგრამ მის გადასალახად ვმუშაობთ.
„ნაპოლიში“ ყველაზე მეტად ის გარემო მომწონს, რომელიც ჩვენს შორის იქმნება. ყველა ჩართულია პროექტში, ეს ყველაზე მშვენიერია. დადებითი გარემოა და ეს დიდ ენერგიას მაძლევს. ტიფოზებმა უნდა იცოდნენ, რომ დღე და ღამე ვმუშაობთ, რათა მათ ჩვენით იამაყონ“, - აღნიშნა კონტემ.
შეგახსენებთ, რომ „ნაპოლი“ 25 ქულით ლიდერობს სერია A-ს და კონკურენტებს უკვე სერიოზული სიგნალი გაუგზავნა, რომ სკუდეტოსთვის იბრძოლებს. ანტონიო კონტეს გუნდი მომდევნო ტურში 3 ნოემბერს, ბერგამოს „ატალანტას“ დაუხვდება.
