რომან გოცირიძე თავისივე პროგნოზებში აიხლართა - ხან ამბობს სებ-მა რეზერვები უნდა იყიდოსო, ხან გაყიდოსო, ხან კიდევ რატომ ყიდის და ყიდულობსო, - წერს სოციალურ ქსელში ეკონომისტი გიორგი ცუცქირიძე.
„ძაღლი ყეფს და ქარავანი მიდის -ზოგიერთებს ჯერ კიდევ ვერ გაუგიათ რეზერვების როლი და მნიშვნელობა ეკონომიკისთვის. სამწუხაროდ, ვერც კონტექსტს იგებენ - რატომ ყიდულობს და ან რატომ ყიდის საქართველოს ეროვნული ბანკი რეზერვებს საჭირო დროს.
თითქმის მთელი წელია ვუყურებ ბატონი რომან გოცირიძის მიერ მოწყობილ ცირკს და საცოდაობას, თუ როგორ ცდილობს თავი ისევ ყოვლისმცოდნე ეკონომისტად წარმოაჩინოს. მაგრამ, როგორც ჩანს, მისგან აღარც ეკონომისტია დარჩენილი და აღარც პოლიტიკოსი. ზოგი ვაიჟურნალისტი კი მაინც არ ანებებს თავს მისი ყოველგვარ რეალობას აცდენილი პროგნოზების გაშუქებას.
ამ ჟურნალისტებს და იმ ხალხს, ვისაც ჯერ კიდევ სჯერა ბატონი რომანის პროგნოზების, შევახსენებ, რომ ჯერ იყო და, მთელი ზაფხული, როცა ეროვნული ბანკი გეგმაზომიერად აგროვებდა საერთაშორისო რეზერვებს, სულ იმას გაიძახოდა, რისთვის ავსებენ რეზერვებს ლარის კურსზე ზემოქმედებსო, იგივე მოხდა როდესაც სებ-მა საქართველოს ეროვნულმა ბანკმა 500 მილიონი აშშ დოლარის ღირებულების 7 ტონა, უმაღლესი სინჯის (999.9), მონეტარული ოქრო შეისყიდა საერთაშორისო რეზერვების დაცლად და, მაღალი რისკის მატარებლად შეაფასა, ოქროს ფასის რყევებთან დაკავშირებით, პირით კი მოხდა, როდესაც ოქროს ფასი შემცირების მაგივრად გაიზარდა. მერე როცა მაისის აქციების პერიოდში, კურსმა მცირედით დაიწყო რყევა, ბატონი რომანი საკუთარივე ლიგიკის საწინააღმდეგოდაც კი წავიდა - ჩქარა, გამოიტანეთ და გაყიდეთ რეზერვები, რას უყურებთო. თუმცა, სებ-ის სტრატეგია რომანის მოწოდების გარეშეც სწორი გამოდგა, დროულად დაიწყო ინტერვენციები, რამაც აჟიოტაჟური სიტუაცია მალევე განმუხტა.
ასეა ახლაც - ბატონ რომანს არ მოსწონს სებ-ის ნაბიჯები და უწუნებს გონივრულად განხორციელებულ ინტერვენციებს. მოკლედ, ამ კაცს ვერაფერს გაუგებ, თავისივე პროგნოზებში იხლართება, ხალხის ახლართვასაც ცდილობს და ხან იყიდეს გაიძახეს, ხან გაყიდეს და ხან კიდევ რატო ყიდი და რატო ყიდულობო.
ეტყობა ამ ხალხს დაავიწყდა, რომ ქვეყნის ცენტრალურ ბანკს აქვს თავისი ზუსტად გაწერილი დღის წესრიგი, სტრატეგია და ხედვა და სწორედ ამ ხედვის შედეგია ის რომ ინფლაცია მიზნობრივზე დაბალია, ეროვნული ვალუტა ინარჩუნებს სიმყარეს, ლარში დეპოზიტები იზრდება და სავალუტო ბაზარზეც მეტ-ნაკლები სტაბილურობაა, მიუხედავად ზოგი ვაი პოლიტიკოსის მცდელობებისა, რომ სხვა სურათი და პანიკური აჟიოტაჟი წარმოაჩინონ.
მე არ მესმის რა ხარისხის რეალობასთან აცდენილი უნდა იყო ადამიანი, რომ ასეთ დროს არ იაზრებდე ყველა გარემოებას, ვერ ხვდებოდე, სებ-ის სწორ სტრატეგიას, რეზერვების გონივრულად მართვას და მუდმივად ცდილობდე, დააზიანო ინსტიტუცია, რომელსაც წლების წინ ხელმძღვანელობდი", - წერს გიორგი ცუცქირიძე.
