მე ეს მოლაპარაკებები უფრო ადრე უნდა დამესრულებინა, მაშინვე, როგორც კი ვერ მოხერხდა ნეიტრალურ პლატფორმაზე შეთანხმება. ჩემი მხრიდან ნეიტრალური პლატფორმის საკითხის დათმობამ მეორე მხარის სიხარბე წაახალისა, - ამის შესახებ „გახარია-საქართველოსთვის“ ლიდერმა გიორგი გახარიამ გამართულ ბრიფინგზე განაცხადა, სადაც „ძლიერ საქართველოსთან“ შეთანხმების ჩაშლის პროცესი შეაფასა.
მისი თქმით, მოლაპარაკებების პროცესის არჩევნებამდე ასე ახლოს დაწყება შეცდომა იყო.
„მინდა აღვნიშნო, რომ ამ მოლაპარაკებების პროცესის არჩევნებამდე ასე ახლოს და მოუმზადებლად, ცესკოს სიების წარდგენამდე ერთი კვირით ადრე დაწყება, იყო შეცდომა, თუმცა ჩვენი მხრიდან პრეზიდენტის ამ შემოთავაზებაზეც უარის თქმა არ იქნებოდა სწორი. მე ეს მოლაპარაკებები უფრო ადრე უნდა დამესრულებინა, მაშინვე როგორც კი ვერ მოხერხდა ნეიტრალურ პლატფორმაზე შეთანხმება. ჩემი მხრიდან ნეიტრალური პლატფორმის საკითხის დათმობამ მეორე მხარის სიხარბე წაახალისა, რამაც პროცესი საბოლოოდ შეიყვანა ჩიხში“, - განაცხადა გახარიამ.
გახარიას თქმით, მოლაპარაკებების პროცესში წერტილი მან დასვა, რადგან მოლაპარაკებების მთავარი მიზანი სიხარბეში დაიკარგა.
„გუშინ დაწყებულმა შავმა პიარმა კიდევ ერთხელ დაგვანახა, რომ მიზანი გახდა არა სამართლიანი შეთანხმების მიღწევა, არამედ ის, თუ ვის დაბრალდებოდა შეთანხმების ჩაშლა. დიახ, წერტილი დავსვი მე. მე წერტილი დავსვი იმიტომ, რომ მიზანი გადამერჩინა - ჩვენი ორი გუნდის სამომავლო შესაძლო სამართლიანი ეფექტური თანამშრომლობის პერსპექტივა, როგორც მთავარი ინსტრუმენტის, ქვეყანაში პოლარიზაციისა და ორპოლუსიანობის დაძლევის. წერტილი დავსვი, იმიტომ, რომ მოლაპარაკებების დაწყების მიზანი შევიდა ჩიხში. სამწუხაროდ, თავდაპირველი მიზანი დაიკარგა სიხარბეში. ვიღაცისთვის მთავარი გახდა მოლაპარაკებების ჩაშლის მეორე მხარისთვის დაბრალება, მეორე მხარისთვის კი ნებისმიერ ფასად ნებისმიერი ქაღალდის ხელმოწერა,“ - განაცხადა გახარიამ.
