„ხალხის ძალის“ პოლიტიკური მდივანი მიხეილ ყაველაშვილი ნაციონალური მოძრაობის გასამართლების მოთხოვნას არგუმენტებით ხსნის და აცხადებს, რომ ძალას, რომელსაც უამრავი დანაშაული აქვს ჩადენილი ქვეყნისა და ხალხის წინაშე, არ აქვს უფლება იარსებოს პოლიტიკურ ველზე. ამის შესახებ მან ჟურნალისტებთან საუბრისას განაცხადა, როცა კომენტარი გააკეთა „ხალხის ძალის“ მიერ დღეს გავრცელებულ წერილზე.
მიხეილ ყაველაშვილი აუცილებლად მიიჩნევს გამოძიების ჩატარებას და იმედოვნებს, რომ გასამართლების შემდეგ, სასამართლო ნაციონალური მოძრაობის დანაშაულებრივ რეჟიმს ფარდას ახდის.
„იმედი გვაქვს, რომ სასამართლო ყველაფერს თავის სახელს დაარქმევს. ეს ძალა [ერთიანი ნაციონალური მოძრაობა] ერთხელ და სამუდამოდ ისეთი დანაშაულებისთვის, როგორებიცაა ბიზნესების წართმევა, პატიმრების წამება და გაუპატიურება, უდანაშაულო ახალგაზრდების ქუჩაში ჩახოცვა და სხვა უამრავი, რაც მათი ხელისუფლების დროს მოხდა, უნდა გასამართლდეს. ვერ იქნება ჩვენი სახელმწიფო სრულყოფილი, თუ ამგვარი პოლიტიკური ერთეული იარსებებს პოლიტიკურ სივრცეში და აუცილებელია გამოძიება," - განაცხადა მიხეილ ყაველაშვილმა.
