„ვიტალი-ჯოტო გუგუჩია ქარდავას პირადი ზონდერია - ზუგდიდის რაიონულ სამმართველოში, ყველა გახმაურებული საქმის წარმოება სწორედ ამ არაკაცს ჰქონდა ჩაბარებული“, - ამის შესახებ „ხალხის ძალის“ წევრი, ზურაბ ქადაგიძე სოციალურ ქსელში წერს.
როგორც ცნობილია, „უცხოური გავლენის გამჭვირვალობის შესახებ“ კანონთან დაკავშირებით, პრეზიდენტის ვეტო დაძლევის შემდეგ, პარლამენტის შენობა დატოვების დროს, ინციდენტი მოხდა - ერთ-ერთმა მოქალაქემ „ხალხის ძალის“ წევრს, დეპუტატ ვიქტორ ჯაფარიძეს სიტყვიერი შეურაცხყოფა მიაყენა, რა დროსაც დეპუტატი მანქანიდან გადმოვიდა, მარკეტიდან ფორთოხალი აიღო და მოქალაქეს ესროლა. თუმცა, ამის შემდეგ, ვიქტორ ჯაფარიძე მარკეტის გამყიდველთან მივიდა, რომ ბოდიში მოეხადა, რა დროსაც დეპუტატი და გამყიდველი ერთმანეთს სიტყვიერად დაუპირისპირდნენ.
ქადაგიძე ამ ფაქტს გამოეხმაურა და აღნიშნა, რომ “ფორთოხლის გამყიდველი“ საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსის, მეგის ქარდავას „პირადი ზონდერი" იყო.
„ვიტალი-ჯოტო გუგუჩია (ვითომ ფორთოხლის გამყიდველი), მეგის ქარდავას ხელ-დასმული გამომძიებელი ნაც-რეჟიმის დროს.
ქარდავას პირადი ზონდერი.
ზუგდიდის რაიონულ სამმართველოში, ყველა გახმაურებული საქმის წარმოება სწორედ ამ არაკაცს ჰქონდა ჩაბარებული.
სწორედ ამ ზონდერმა შეკერილი საქმეებით დაიჭირა ნანა ფაჟავა, ილია ჩაჩიბაია და კახა მიქაია ნაც-მოძრაობის რეჟიმის დროს“, - დაწერა ზურაბ ქადაგიძემ.
