საქართველოს სასიცოცხლო ინტერესებთან დაკავშირებულ თემებში, ეს განცხადება ამოვარდნილია როგორც მათი პროფესიული საქმიანობის ფორმატიდან, ასევე, იმ ინტერესებიდან, რომელიც ნებისმიერ სახელმწიფოს აქვს, როდესაც მის სუვერენიტეტზეა საუბარი, - ასე გამოეხმაურა პარლამენტის ვიცე-სპიკერი გიორგი ვოლსკი 5 მოსამართლის მიერ ე.წ. ვეტინგის სისტემის დანერგვის მოთხოვნის გაზიარებას.
„თუ კონკრეტული მოსამართლეები თავისი პოლიტიკური გემოვნებით „ნაცმოძრაობასთან” არიან დაკავშირებულები, ეს არის ფაქტი, მაგრამ ამ ფაქტის იქით, კიდევ უფრო მძიმე დანაშაულია - მორალური დანაშაული, როდესაც მოსამართლე გამოდის და განსაზღვრავს, როგორ უნდა არსებობდეს სახელმწიფო და როგორ უნდა თმობდეს თავის სუვერენიტეტს, იჯდეს სტუდენტის მერხთან და ვიღაც გამოცდას უტარებდეს“, - აღნიშნა ვოლსკიმ.
5 მოსამართლე - ნინო ბაქაქური, ეკატერინე გასიტაშვილი, მადონა მაისურაძე, ქეთი მესხიშვილი და მამუკა წიკლაური ქართულ სასამართლოში „ვეტინგის“ სისტემის დანერგვას იზიარებენ.
