პარტია “საქართველოსთვის” საპარლამენტო პოლიტიკური ჯგუფის თავმჯდომარის ბექა ლილუაშვილის ბრიფინგი:

"გახარიას გუნდი, პარტია „საქართველოსთვის“ გამოდის ინიციატივით, საქართველოს კონსტიტუციაში განხორციელდეს ცვლილება პრეზიდენტის არჩევის წესთან დაკავშირებით, კერძოდ, დაბრუნდეს მანამდე არსებული წესი და საქართველოს მომავალი პრეზიდენტი, საარჩევნო კოლეგიის ნაცვლად, კვლავ პირდაპირი წესით, საქართველოს მოქალაქეებმა აირჩიონ. ეს უზრუნველყოფს პრეზიდენტის საჭირო ლეგიტიმაციასა და დამოუკიდებლობას.

ხელისუფლებაში ბალანსის პრობლემებზე ისაუბრა ივანიშვილმაც, რომელმაც აღიარა ოცნების ხელისუფლების შეუზღუდავი და უკონტროლო ძალაუფლების პრობლემა. მაგრამ პრობლემის კონსტიტუციურად მოგვარების ნაცვლად, საკუთარი თავი შემოგვთავაზა (უკვე მე-3 მედ სხვათა შორის) ხელისუფლების მაკონტროლებლის როლში. მიუხედავად ამდენი იმედგაცრუებისა, რომც დავიჯეროთ, რომ ბიძინა ივანიშვილს თავისივე ოცნების ძალაუფლების დაბალანსება უნდა, დემოკრატიულ სისტემაში შეუძლებელია 1 ადამიანი წარმოადგენდეს სახელმწიფოს სტაბილურობის გარანტს. შესაბამისად, ლოგიკურად მის ინტერესშიც უდა შედიოდეს მაღალი ლეგიტიმაციის კონსტიტუციური ინსტიტუტების შენარჩუნება.

ამიტომ, მოვუწოდებთ „ოცნების“ საპატიო თავმჯდომარესა და საპარლამენტო უმრავლესობას, ამ საგაზაფხულო სესიიდანვე დავიწყოთ მუშაობა კონსტიტუციურ ცვლილებაზე, სახელმწიფოს მეთაურის - პრეზიდენტის საქართველოს მოქალაქეების მიერ პირდაპირი გზით არჩევის წესის დაბრუნებასთან დაკავშირებით.

ეს საკითხი ჩვენი პარტიის საარჩევნო პროგრამის ნაწილი იყო, თუმცა საახალწლო სიურპრიზებმა პროცესები ჩვენდა სასიკეთოდ დააჩქარა. სხვათა შორის არაერთმა ევროპულმა სახელმწიფომ მოახდინა პირდაპირი წესით პრეზიდენტის არჩევის წესის დაბრუნება“.