დღეს გვყავს ხელისუფლება, რომელიც 2008 წლის ომზე კვლავ ბინძურად სპეკულირებს, ბიძინა ივანიშვილის თოჯინა – ღარიბაშვილი ბედავს და აუგად მოიხსენიებს მაშინდელ მთავარსარდალს, პრეზიდენტ სააკაშვილს, პრეზიდენტს, რომელმაც პირველად გაუწია წინააღმდეგობა მკვლელ, ტერორისტ პუტინს ჩვენს ჯარისკაცებთან ერთად, – ამის შესახებ „ნაციონალური მოძრაობის“ თავმჯდომარეობის კანდიდატმა, ლევან ხაბეიშვილმა განაცხადა.

ხაბეიშვილის თქმით, „საქართველოს დღევანდელ ხელისუფლებას არ სურს და არ სჯერა, რომ რუსეთი დამარცხდება უკრაინაში“.

„ვუსამძიმრებ კიდევ ერთხელ უკრაინაში დაღუპულ გმირი ჯარისკაცების ოჯახებსა და მთელ საქართველოს. ბიძინა ივანიშვილი უკვე ათი წელია ყოფს, აპირისპირებს და ხლეჩს საზოგადოებას. ცდილობს, გადაწეროს ისტორია რუსულად და შემოგვასაღოს, რომ არ ვართ სოლიდარულები, არ ვართ პატრიოტები და არ გვტკივა ჩვენი და ჩვენი ძმების ტკივილი. მიგვაჩვია, რომ უღირსად იქცევა ხელისუფლება და მოღალატეობრივ საქმიანობას ეწევა საქართველოში. საქმე საბოლოოდ იქამდეც კი მივიდა, რომ საჯარო მოხელეებს, სახელისუფლებო გუნდის წევრებს აკრძალული აქვთ სამძიმრის თქმაც, სანამ რუსი ოლიგარქის სასახლიდან არ მოვა კონკრეტული სიგნალები. მხოლოდ უკანასკნელ თვეებში, პატარა საქართველომ უკვე რამდენიმე ათეული ვაჟკაცი ჯარისკაცი დაკარგა მშვიდობისთვის ომში. ეს არის ომი მშვიდობისთვის, რაც უკრაინაში მიმდინარეობს. თავისუფალ უკრაინელ ხალხს სურს საკუთარ მიწაზე, საკუთარ ქვეყანაში მშვიდობიანი და თავისუფალი ცხოვრება, რასაც ვერ ეგუება ტერორისტი პუტინი და აწარმოებს არაადამიანურ, ტერორისტულ ომს უკრაინაში. ქართველი ბიჭები იბრძოდნენ მარიუპოლში, რადგან ომი არ მისდგომოდა ბახმუტს. დაეცნენ ბახმუტთან, რადგან ომი არ მიადგეს კიევს და უკრაინის სხვა ქალაქებს და იცავენ უკრაინას და კიევს იმიტომ, რომ შემდეგ ომი არ მოადგეს საქართველოს და თბილისს. რუსების დამყარებული მშვიდობა ვნახეთ ბუჩაში – ნაწამები, გაუპატიურებული და დახოცილი მშვიდობიანი მოსახლეობა, მათ შორის ბავშვები. ეს ტრაგედია ბუჩაში მოხდა მას შემდეგ, რაც იქ დამყარდა „რუსული მშვიდობა“, – განაცხადა ხაბეიშვილმა.

ხაბეიშვილის განცხადებით, „თავისუფლებისთვის ომში უკრაინა აუცილებლად გაიმარჯვებს“.

„უკრაინის მხარეს არის სიმართლე და მთელი ცივილიზებული სამყარო. სამწუხაროდ, ამ დროს ჩვენს ქვეყანას ჰყავს ხელისუფლება, რომელიც საქართველოში საქართველოსთვის, მშვიდობისათვის და თავისუფლებისთვის დაღუპულ ჯარისკაცებს არ გლოვობს. დღეს გვყავს ხელისუფლება, რომელიც 2008 წლის ომზე კვლავ ბინძურად სპეკულირებს. ბიძინა ივანიშვილის თოჯინა, ღარიბაშვილი ბედავს და აუგად მოიხსენიებს მაშინდელ მთავარსარდალს, პრეზიდენტ სააკაშვილს. პრეზიდენტს, რომელმაც პირველად გაუწია წინააღმდეგობა მკვლელ, ტერორისტ პუტინს ჩვენს ჯარისკაცებთან ერთად. არც ერთი წამით პრეზიდენტ სააკაშვილს არ მიუტოვებია არათუ ქვეყანა და ხალხი, არამედ ბრძოლის ველი. ის, რასაც ბინძურად სპეკულირებს რუსული ოცნება საქართველოში, არის რუსული პროპაგანდის გაგრძელება და რომ არა მაშინდელი მთავარსარდლის თავგანწირვა, ყველას კარგად გვახსოვს მკვლელი პუტინის ზრახვები თბილისის აღებასთან დაკავშირებით. დღეს ჩვენ გვყავს ხელისუფლება, რომელსაც არ სურს და არ სჯერა, რომ რუსეთი დამარცხდება უკრაინაში. მე, რიგითმა ქართველმა ლევან ხაბეიშვილმა მინდა, მოგმართოთ თქვენ, ქართველ ხალხს. არათუ ჩემი პოლიტიკური მიზანი, ჩემი ცხოვრების, ჩემი არსებობის, ჩემი სიცოცხლის მიზანია, საქართველო იყოს თავისუფალი, ერთიანი და მშვიდობიანი. ჩემი მიზანია, საქართველომ გაიმარჯვოს და დავაფასოთ ომის გმირები. ჩემი მიზანია, გადავარჩინოთ პრეზიდენტი სააკაშვილი. ჩვენ ვერავინ ვიცხოვრებთ ჩვენი ცხოვრებით, ვიდრე პრეზიდენტი სააკაშვილი კვდება ციხეში და გვყავს მთავრობა, რომელიც შინაგანადაც არ გლოვობს დაღუპულ ქართველ გმირებს. მინდა, მყავდეს ქართული, ეროვნული მთავრობა. რუსული ოცნების მარცხი განხორციელდება მხოლოდ ერთობით ბრძოლით და მოქმედებით“, – განაცხადა ხაბეიშვილმა.