ოპოზიციის მიერ ახლა არჩეულ ტაქტიკას მივესალმები, რომ ხალხთან ლაპარაკი სურთ. ამან შესაძლოა მათი პოზიციები რადიკალურად შეცვალოს, - ამის შესახებ საპარლამენტო უმრავლესობის ერთ-ერთმა ლიდერმა, გიორგი ხელაშვილმა „შაბათის ქრონიკის“ ეთერში განაცხადა.

„ოპოზიციამ განაცხადა, რომ ისინი აპირებენ გავიდნენ და რაც შეიძლება მეტ ხალხს დაელაპარაკონ. ამით აღიარეს, რომ ხალხი მათ მხარს არ უჭერს და საზოგადოებას არ ესმის თუ რაზე საუბრობენ ისინი“, - აღნიშნა ხელაშვილმა.

მისი თქმით, ოპოზიციას აქვს ილუზია, რომ ინდივიდუალურად დაელაპარაკება ადამიანებს და ამ პროპაგანდითა და ინიციატივით თავის ჭკუაზე გადმოიყვანს. „მაგრამ ჩვენ ვიცით რომ ეს ასე არ ხდება. ეს არის დიალოგი. თუ ისინი მართლაც მივლენ თავიანთ აქტივისტებთან ან უბრალოდ დაიწყებენ სიარულს ხალხში, დიდი ალბათობაა, რომ ხვალ არამც თუ პარლამენტში შემოვიდნენ, არამედ საერთოდ წავიდნენ პოლიტიკიდან. ვინაიდან მათ შეიძლება არ იცოდნენ ხალხის განწყობა სინამდვილეში როგორია. თუ მართლა წავლენ და ხალხს შეეკითხებიან, ხალხი მათ პირდაპირ ეტყვის, თუ რა უნდა გააკეთონ. ამიტომ 15 მაისამდე კი არა, მანამდეც შესაძლოა იმისგან განსხვავებული რადიკალური გადაწყვეტილება მიიღონ რაც ჩაიფიქრეს“, - აღნიშნა ხელაშვილმა.

დღეს რადიკალური ოპოზიცია კვლავ შეიკრიბა. შეხვედრის დასრულების შემდეგ, მათ კვლავ აქციები დააანონსეს.