„ევროპული საქართველოს“ წევრის, ლევან თარხნიშვილის განცხადებით, ამ ეტაპზე ხელისუფლებასთან მოლაპარაკების გაგრძელების აზრს ვერ ხედავს.
მისი შეფასებით, „ქართულმა ოცნებამ“ პოლიტიკურ მხარეებს შორის მოლაპარაკების ყოველ რაუნდზე წარმოადგინა ერთი მეორეზე არაადეკვატური წინადადებები, რომლებიც აბსოლუტურად მიუღებელი იყო „ევროპული საქართველოსა“ და მთლიანად ოპოზიციისთვის.
„შემდეგ კიდევ ერთი არაადეკვატური ნაბიჯი და თავისივე თავთან გააფორმა მემორანდუმი, რომელიც დაწუნებულ წინადადებებზე უარეს წინადადებებს ითვალისწინებდა. შესაბამისად, ამ ფარგლებში, ჯერჯერობით მოლაპარაკების გაგრძელების არსს ნამდვილად ვერ ვხედავ. ჩვენ ველოდებით ახალ წინადადებებს, რომლებიც გაითვალისწინებს არსებულ რეალობას, გაითვალისწინებს იმას, რა ჩიხშიც ვიმყოფებით და იქნება ადეკვატური“, – განაცხადა ლევან თარხნიშვილმა.
თარხნიშვილის განმარტებით, ოპოზიცია პირველი ნოემბრის შემდეგ დაფიქსირებულ პოზიციაზეა.
„ეს არის ახალი არჩევნები, თვისობრივად ახალი საარჩევნო გარემო, ახალი საარჩევნო ადმინისტრაცია, პოლიტპატიმრების გამოშვება და პოლიტიკური საქმეების შეწყყვეტა. აქ ახალი არაფერია, ამას ვაჟღერებთ ამდენი ხნის განმავლობაში და არაერთხელ დავამტკიცეთ, რომ შეგვიძლია, ვიყოთ კონსტრუქციულები. როდესაც მოლაპარაკება ჩიხში შევიდა, ჩვენ შევთავაზეთ აბსოლუტურად ლოგიკური გზა, რომ, მოდი, საქართველოს ამომრჩევლებს ვკითხოთ, რა უნდათ მათ. უნდათ თუ არა ახალი არჩევნები და შესაბამისად, ამის ყველაზე კარგი მექანიზმი არის პლებისციტი. ხელისუფლება მაშინაც არაადეკვატური იყო და უარი განაცხადა ამ წინადადებებზე. რაც შეეხება, რა შედეგები მივიღეთ, შედეგი მიღწეულია, ხელისუფლება ზის ერთპარტიულ პარლამენტში და ვინც არ უნდა შეიყვანოს, გინდა, ფრიდონა ინჯია, გინდა, ბატონი ზილფიმიანი და თავისი სატელიტები, ამით რეალობა არ შეიცვლება, ეს არის ერთპარტიული პარლამენტი“, – აღნიშნა ლევან თარხნიშვილმა.
ლევან თარხნიშვილის თქმით, ოპოზიციას ერთმანეთთან მუდმივი კონსულტაციები აქვს.
„როგორც არაფორმალური შეხვედრები, ისე სატელეფონო საუბრები. როდესაც რამე ახალი იქნება, ახალი რეალობა დადგება, ჩვენ, რა თქმაუნდა, შევიკრიბებით. ჯერჯერობით არის ისევე, როგორც იყო“, – განაცხადა ლევან თარხნიშვილმა.
