„ჩვენ გვინდა, რომ ჩავატაროთ კვლევა და იმ რაიონების სრული სურათი მივიღოთ, სადაც ტრანსპორტის ნაკლებობაა,“ – ამის შესახებ კახა კალაძემ დღეს, 17 აპრილის მთავრობის სხდომაზე ისაუბრა.

როგორც დედაქალაქის მერმა აღნიშნა, კვლევის ფარგლებში გამოიკვეთება, თუ როგორ შეიძლება მოგვარდეს ზოგიერთ რაიონში ტრანსპორტთან დაკავშირებული პრობლემები.

“შეიძლება ეს იყოს ტრამვაი, ან მეტრო”, — აღნიშნა კალაძემ და მაგალითისთვის დიდი დიღომი მოიყვანა:

“დიღმის მიმართულებით არის სერიოზული მოსაზრება, რომ მიწისზედა მეტროს განხორციელება შესაძლებელია. შესაბამისად, კვლევა ჩვენ გვაჩვენებს, ყველაფერს, თუ როგორ შეიძლება ამ მიმართულებით განვვითარდეთ. რამდენიმე კვირაში დაიწყება კვლევითი სამუშაოები და გვექნება სრული სურათი, თუ რა პროექტები უნდა განხორციელდეს,“ – განაცხადა კახა კალაძემ.

ამასთან, თბილისის მერმა სამგორი-ლილოს მიმართულებით მიწისზედა მეტროს მშენებლობის პროექტზეც ისაუბრა. მისი განცხადებით, უახლოეს დღეებში გახდება ცნობილი ამ ტენდერში გამარჯვებული კომპანია, რომელიც პროექტს 2019 წლის ბოლომდე შეიმუშავებს.

„თქვენ იცით, რომ სამგორი-ლილოს მიმართულებით ჩვენ გამოცხადებული გვაქვს ტენდერი პროექტზე. უახლოეს დღეებში გვეცოდინება გამარჯვებული კომპანია. ის დაიწყებს პროექტზე მუშაობას. წლის ბოლოსთვის უნდა იყოს მზად სრული პროექტი, რის შემდეგაც სამშენებლო ტენდერს გამოვაცხადებთ და დავიწყებთ მის განხორციელებას,“ – განაცხადა დედაქალაქის მერმა კახა კალაძემ.