ეკა ბესელია პოზიციებს არ თმობს და „ქართულ ოცნებას“ ულტიმატუმს უყენებს. პარტიის წევრმა უზენაესი სასამართლოს მოსამართლეობის კანდიდატების იმ სიის გაწვევა მოითხოვა, რომელიც „ქართულ ოცნებაში“ განხეთქილების მიზეზი გახდა. იურიდიული კომიტეტის ყოფილი თავმჯდომარე ამბობს, რომ ბრძოლას გააგრძელებს და მისი ეს პოზიცია არ შეიცვლება. მოთხოვნას ბიძინა ივანიშვილის ჩარევის შემთხვევაშიც არ შეცვლის.
ეკა ბესელიამ დღეს მმართველ პარტიასთან დაპირისპირების დეტალებიც გაიხსენა. ის ამტკიცებს, რომ განხეთქილება ჯერ კიდევ თვეების წინ, სასამართლოს რეფორმის მეოთხე ტალღის ინიცირების შემდეგ დაიწყო. იურიდიული კომიტეტის ყოფილი თავმჯდომარე ამბობს, რომ სწორედ მისი მკვეთრი პოზიციის გამო წამოიწყეს კობახიძე-მდინარაძე- ზარდიაშვილის ჯგუფმა ბრძოლა და კომიტეტის თავმჯდომარეობიდან მისი ჩამოშორება გადაწყვიტეს.
ირაკლი კობახიძემ ეკა ბესელია ჯერ კიდევ განცხადების გაკეთებამდე გააფრთხილა, არ დაეშვა შეცდომა და გუნდის წინააღმდეგ არ წასულიყო. სანაცვლოდ, უმრავლესობიდან მისი გაშვებაც არ გამორიცხა.
