ჩვენი საბოლოო მიზანი არის დახვეწილი საპარლამენტო სისტემის ჩამოყალიბება, - ამის შესახებ საქართველოს პარლამენტის თავმჯდომარემ ირაკლი კობახიძემ საქართველოს პარლამენტში გამართულ ბრიფინგზე განაცხადა.
მისი თქმით, საპარლამენტო უმრავლესობის მიერ შემოთავაზებული ცვლილებათა პაკეტი, რომელიც დღეს სახელმწიფო საკონსტიტუციო კომისიის გაერთიანებულ სხდომაზე წარადგინეს, სრულად უზრუნველყოფს ორ ამოცანას, კერძოდ, კონსტიტუციის სრული შესაბამისობის უზრუნველყოფას კონსტიტუციური სამართლის ფუნდამეტურ პრინციპებთან და ქვეყნის გრძელვადიანი დემოკრატიული განვითარებისთვის კონსტიტუციური საფუძვლის ჩაყრას.
”არაერთხელ გაჟღერდა თხოვნა, რომ მმართველ გუნდს წარმოედგინა თავისი ზოგადი ხედვა იმ სისტემასთან დაკავშირებით, რომელიც ჩვენი თვალსაზრისით უნდა ჩამოყალიბდეს საქართველოს კონსტიტუციაში. დღეს ჩვენ კომისიის წინაშე წარვადგინეთ ზოგადი ხედვა, რომელთან დაკავშირებითაც გვქონდა ჩვენ მსჯელობა მმართველი გუნდის ხელმძღვანელობაში. ეს არ არის საბოლოოდ ჩამოყალიბებული, თუმცა, ეს არის ის წინასწარი მოსაზრებები, რომლებიც გავაცანით სახელმწიფო საკონსტიტუციო კომისიას.
საბოლოო მიზანი არის დახვეწილი საპარლამენტო სისტემის ჩამოყალიბება. ჩვენ, პარლამენტის დადგენილების თანახმად, დაგვეკისრა ორი ამოცანა - ერთი ამოცანაა, კონსტიტუციის სრული შესაბამისობის უზრუნველყოფა კონსტიტუციური სამართლის ფუნდამეტურ პრინციპებთან. მეორე ამოიცანაა ქვეყნის გრძელვადიანი დემოკრატიული განვითარებისათვის კონსტიტუციური საფუძვლის ჩაყრა.
ჩვენ ვფიქრობთ, რომ ის მოდელი, რომელიც წარმოდგენილი გვაქვს, სრულად უზრუნველყოფს ორივე ამოცანას. ჩვენს მიერ შემოთავაზებული მოდელი დგას სამ ძირითად ფუნდამენტზე, ეს არის ძლიერი პარლამენტი, ქმედითი მთავრობა და დამოუკიდებელი სასამართლო. სწორედ ამ მიზნების მიღწევას ემსახურება თითოეული ცვლილება, რომელიც ჩვენს მიერ იქნა შეთავაზებული სახელმწიფო საკონსტიტუციო კომისიისთვის”, - განაცხადა ირაკლი კობახიძემ.
