უმრავლესობის წევრის, გია ვოლსკის განცხადებით, ბიძინა ივანიშვილმა პარტია „ქართული ოცნებიდან“ დავით ჭიჭინაძის გარიცხვის გადაწყვეტილების შესახებ იცოდა. ამასთან, გია ვოლსკიმ აღნიშნა, რომ პარტიაში კრიტიკული აზრის გამოთქმაზე არავითარი შეზღუდვა არ არსებობს.
„არსებობს მთავარი ამოცანა, რომელიც აქვს ოპონენტ მხარეს. ეს არის დესტაბილიზაცია და მმართველი გუნდის რყევა. ამ ნარატივში კარგად ჯდება ის იდეა, რომელიც წამოაყენა დავით ჭიჭინაძემ. არა მგონია, მის მიერ განგებ კეთდებოდეს, მგონი თავის შეხედულებით აკეთებს ამას, მაგრამ რეალურად პრობლემა ნამდვილი ეს არის და არა ფრაქციის შექმნაზე ჭორაობა. „ნაციონალური მოძრაობის“ ინტერესი ეს არის და ამას ემთხვევა ის, რასაც დათო ჭიჭინაძე აკეთებს“, - განაცხადა გია ვოლსკიმ.
მისი თქმით, დავით ჭიჭინაძეს შეუძლია პოლიტსაბჭოს მიმართოს და რეგლამენტით გათვალისწინებულია, რომ სამდივნოს გადაწყვეტილება გასაჩივრდეს პოლიტსაბჭოში.
