რეინტეგრაციის საკითხებში სახელმწიფო მინისტრი პაატა ზაქარეიშვილი საქართველოს პარლამენტის რეზოლუციაში ძალის გამოუყენებლობის ვალდებულების დადასტურებას მნიშვნელოვნად მიიჩნევს.
როგორც "ინტერპრესნიუსს" რეინტეგრაციის სამინისტროდან აცნობეს, სახელმწიფო მინისტრის შეფასებით, მნიშვნელოვანია დოკუმენტში ამ პუნქტის შეტანა და პრეზიდენტის ზეპირსიტყვიერი განცხადების პარლამენტის რეზოლუციით დადასტურება.
"რა თქმა უნდა, პრეზიდენტის მიერ სტრასბურგში გაკეთებული განცხადება პოლიტიკურად ძალიან მნიშვნელოვანი იყო, მაგრამ ეს მაინც ზეპირსიტყვიერი განცხადება იყო და შემდგომში არანაირი ნორმატიული აქტით არ ყოფილა გამყარებული. აფხაზური და ოსური მხარეები აცხადებდნენ, რომ არ ენდობოდნენ მიხეილ სააკაშვილს და მისი განცხადება ფარისევლური იყო. ისინი ორმხრივი ხელშეკრულებების გაფორმებას მოითხოვდნენ. საქართველოს პარლამენტი არის ლეგიტიმური, ქვეყნის უმღლესი საკანონმდებლო ორგანო და ნებისმიერი ორმხრივი ხელშეკრულება აფხაზებთან და ოსებთან ამ რელუზიციასთან შედარებით გაცილებით დაბალი რანგის იქნებოდა", - აღნიშნა სახელწმიფო მინისტრმა.
მისივე განცხადებით, ახალი ხელისუფლების პირობებში საფუძველი ეცლება აფხაზური და ოსური მხარეების არგუმენტს პიროვნული უნდობლობის შესახებ, რომელიც მათ პრეზიდენტ სააკაშვილის მიმართ ჰქონდათ.
"ახალ ხელისუფლებაში არიან ადამიანები, რომლებზეც აფხაზური და ოსური მხარეები ვერ იტყვიან, რომ მათ არ ენდობიან, რადგან წლების განმავლობაში ენდობოდნენ. შესაბამისად, ჩვენი მთავრობის მიმართ არ აქვთ უნდობლობა და მიუღებლობა, რომელიც ჰქონდათ სააკაშვილის მიმართ. ამიტომ ამ პოზიციის გამყარებას ეს კონტექსტიც უწყობს ხელს", - განაცხადა პაატა ზაქარეიშვილმა.
სახელმწიფო მინისტრი აღნიშნულ რეზოლუციას მთავარ საკითხებზე ძველ და ახალ ხელისუფლებას შორის შეჯერებული პოზიციის მაგალითად მიიჩნევს და აღნიშნავს, რომ ამგვარი დოკუმენტის მიღება საერთაშორისო თანამეგობრობისთვისაც მნიშვნელოვანია.
პარლამენტის რეზოლუციის პრეამბულაში, რომელიც საკანონმდებლო ორგანომ გასულ კვირაში დაამტკიცა, აღნიშნულია, რომ საქართველო ადასტურებს ვალდებულებას ძალის გამოუყენებლობის შესახებ, რომელიც საქართველოს პრეზიდენტმა საერთაშორისო საზოგადოების წინაშე 2010 წლის 23 ნოემბერს სტრატსბურგში, ევროპარლამენტში სიტყვით გამოსვლისას აიღო.
