საქართველოს თავდაცვის მინისტრმა ირაკლი ალასანიამ ავღანეთში დაჭრილი სამხედრო მოსამსახურეები მოინახულა.
თავდაცვის სამინისტროს ინფორმაციით, უწყების ხელმძღვანელი გერმანიაში ამერიკის შეერთებული შტატების სამხედრო ჰოსპიტალს დღეს ესტუმრა. ლანდშტულის სამხედრო ჰოსპიტალში მკურნალობის კურსს ამჟამად საქართველოს შეიარაღებული ძალების ხუთი სამხედრო მოსამსახურე გადის.
სამინისტროს ცნობით, საქართველოს თავდაცვის მინისტრი ქართველი სამხედროების ჯანმრთელობის მდგომარეობით დაინტერესდა და მათი პრობლემები მოისმინა. ალასანიამ ქართველ ჯარისკაცებს გაწეული სამსახურისთვის მადლობა გადაუხდა და გამოჯანმრთელება უსურვა.
II ქვეითი ბრიგადის 23-ე მსუბუქი ქვეითი ბატალიონის სამხედრო მოსამსახურეები- კაპრალი რამაზ დავითაია, რიგითი ავთანდილ ბებია, კაპრალი რომან ლიპარტელიანი, ასევე, III ქვეითი ბრიგადის 32-ე მსუბუქი ქვეითი ბატალიონის სამხედრო მოსამსახურეები - რიგითი ამირან კაპანაძე და კაპრალი გიგა ზივზივაძე სამშვიდობო მისიას ავღანეთში, ჰელმანდის პროვინციაში ასრულებდნენ.
