კოალიცია "ქართული ოცნების" წევრი ამირან გამყრელიძე, რომელიც შრომის, ჯანმრთელობისა და სოციალური დაცვის მინისტრობის კანდიდატად იყო დასახელებული მინისტრობაზე უარს აცხადებს და აღნიშნულ საკითხებში ბიძინა ივანიშვილის მრჩეველობას აპირებს.
ამის შესახებ გამყრელიძის მიერ გავრცელებულ განცხადებაშია ნათქვამი.
„გულწრფელი მადლობა ბიძინა ივანიშვილს და კოალიცია "ქართულ ოცნებას"’ დიდი ნდობისთვის, როცა გასული კვირის ორშაბათს დავსახელდი საქართველოს შრომის, ჯანმრთელობისა და სოციალური დაცვის მინისტრობის კანდიდატად ახალ კაბინეტში. ეს უდიდესი პატივია და კიდევ უფრო დიდი პასუხისმგებლობა, როდესაც ქვეყნის განვითარების უმნიშვნელოვანეს ეტაპზე სათავეში უდგები ყველაზე უფრო სათუთსა და მგრძნობიარე დარგს - მოსახლეობის ჯანმრთელობისა და სოციალურ დაცვას, სფეროს, რომელთანაც შეხება აქვს საქართველოს თითოეულ მოსახლესა და ოჯახს. ივანიშვილთან პირველი შეხვედრისას მე ჩემს თავს უფრო მრჩევლის რანგში მოვიაზრებდი როგორც ჯანმრთელობის მსოფლიო ორგანიზაციის წარმომადგენელი და თავს ვიკავებდი თანამდებობაზე დანიშვნისგან ორი მიზეზით - როგორც ძველი მთავრობის ერთ-ერთი სახე და ასაკი. ეს მიზეზები არ იქნა მხედველობაში მიღებული და მე დავთანხმდი შემოთავაზებას მხოლოდ ერთი ყველაზე მნიშვნელოვანი გარემოების გამო, რამეთუ პირველად დამოუკიდებელი საქართველოს ისტორიაში მოსახლეობის ჯანმრთელობა ივანიშვილის მიერ გამოცხადდა პოლიტიკურ პრიორიტეტად.
თუმცა ჩვენ პირველ ეტაპზე ვერ გავითვალისწინეთ ერთი მნიშვნელოვანი გარემოება, რომ არსებობდა გარკვეული უხერხულობა და მორალური ინტერესთა კონფლიქტი ჩემს მომავალ პოზიციასა და ჩემი შვილის თანამდებობას შორის, რომელიც ბოლო ხუთი წლის განმავლობაში გახლდათ ყველაზე დიდი კერძო სადაზღვევო კომპანიის "ალდაგი ბი სი აის" გენერალური დირექტორი. კიდევ ერთხელ ხაზს ვუსვავ, ეს არ გახლდათ ინტერესთა სამართლებრივი კონფლიქტი, მაგრამ იყო მორალური უხერხულობა. ამის შესახებ დაიწერა პრესაშიც, მას მოჰყვა ჩემთვის და ჩემი ოჯახისთვის არასასიამოვნო ინტერპრეტაციები.
ამასთან დაკავშირებით, უკანასკნელ დღეებში რამდენიმეჯერ მქონდა კონსულტაციები ბიძინა ივანიშვილთან (ბოლოს გუშინ) და მივიღე გადაწყვეტილება, რომ უარი ვთქვა შემოთავაზებულ თანამდებობაზე, რათა არ ვიყო ბარიერი ჩემი ოჯახის მომავალი თაობის განვითარების გზაზე, ოჯახის, რომლის რეპუტაცია არასოდეს შელახულა და დარწმუნებული ვარ არც შეილახება.
ჩვენ დიდი გამოწვევის წინაშე ვართ, პირველად დამოუკიდებელი საქართველოს ისტორიაში მოსახლეობის ჯანმრთელობა გამოცხადდა ერთ-ერთ უმთავრეს პოლიტიკურ პრიორიტეტად, რამეთუ ხელისუფელაბაში მოსულ გამარჯვებულ ძალას კარგად აქვს გაცნობიერებული, რომ ჯანმრთელი და განათლებული საქართველო მთავარი საწინდარია ქვეყნის განვითარებისა. ჩვენ ყველამ ერთად უნდა დავიწყოთ ფართო საზოგადოებრივი მოძრაობა - ჯანმრთელი საქართველოსთვის.
ასევე მსურს, გაუწყოთ ჩვენი ერთობლივი შეთანხმება ბიძინა ივანიშვილთან, რომ მე დავრჩები მის მრჩევლად ჯანმრთელობისა და სოციალური დაცვის საკითხებში როგორც ჯანმრთელობის მსოფლიო ორგანიზაციის წარმომადგენელი", - აღნიშნულია განცხადებაში.
