სკანდალური ამერიკელი მომღერალი ლედი გაგა ჯონ ლენონის სახელობის პრემიის „LennonOno Grant for Peace 2012“ მეხუთე გამარჯვებული გახდა. დაჯილდოების ცერემონია ჯონ ლენონის დაბადებიდან 72 წლისთავს ეძღვნება.
ჯონ ლენონის მეუღლემ მხატვარმა და მომღერალმა იოკო ონომ ლენონის სახელობის პრემია, ბითლზის წევრის პატივსაცემად 2002 წელს დააარსა. დაჯილდოების ცერემონიალი ორ წელიწადში ერთხელ იმართება და ის არტისტებს, ადამიანის უფლებებისა და მშვიდობის დამყარებაში გაწეული ღვაწლისთვის ენიჭებათ.
ონოს განცხადებით, გაგა არის თანამედროვეობის ერთ-ერთი ყველაზე გამორჩეული არტისტი, რომელმაც თავისი უკანასკნელი ალბომით "Born This Way" "მსოფლიოს ინტელექტუალური რუკა მნიშვნელოვნად შეცვალა".
თანხის რაოდენობა ამ ეტაპზე არ სახელდება, თუმცა ცნობილია, რომ ლედი გაგა მიღებულ თანხას ელტონ ჯონის სახელობის შიდსთან ბრძოლის ფონდში გადარიცხავს.
