ცესკომ 1-ელ ოქტომბერს გამართული საპარლამენტო არჩევნების შედეგების დათვლა დაასრულა.
დათვლილია ყველა - 3766 უბნის და 70 სპეცუბნის მონაცემები.
ხმების დათვლის წინასწარი შედეგებით, პოლიტიკური კოალიცია „ქართული ოცნება“ - 54.85%-ით ლიდერობს, „ერთიან ნაციონალურ მოძრაობას“ 40.43% აქვს, „გიორგი თარგამაძე - ქრისტიან-დემოკრატიული მოძრაობა“ - 2,05%, „შალვა ნათელაშვილი ლეიბორისტული პარტია“ - 1,24%. სხვა პარტიებმა 1%-ზე ნაკლები ხმები მოიპოვეს.
ცესკო-ს სპიკერის ეკა აზარაშვილის განცხადებით, ამჟამად, საჩივრების განხილვა მიმდინარეობს, თუმცა საბოლოო შედეგებზე, ეს მნიშვნელოვან გავლენას ვერ მოახდენს.
აზარაშვილის თქმით, საქართველოს მასშტაბით გაუქმებულია 8 უბნის, კერძოდ, საგარეჯოს, მარნეულის, თეთრიწყაროს, კასპის, გორის, ახალციხის, მარტვილისა და ხულოს თითო უბნის მონაცემები.
რაც შეეხება, ხაშურის ორ უბანზე მომხდარ ინციდენტებს, აზარაშვილის თქმით, ამასთან დაკავშირებით საქმე პროკურატურაშია გადაგზავნილი.
