საქართველოში „ვეფხისტყაოსნის“ მიხედვით ფილმს გადაიღებენ. ფილმის გადაღებები მომავალი წლიდან დაიწყება. იდეის ავტორები ლევან დაბრუნდაშვილი და ჯაბა მელქაძე არიან. ფილმის ტრეილერი ინტერნეტსივრცეში ცოტა ხნის წინ, გამოჩნდა. რამდენიმეწუთიან ტრეილერში, ნაწარმოების ის მონაკვეთია აღწერილი, როცა გმირები ქაჯეთის ციხის ასაღებად დაწყევლილ ადგილს უახლოვდებიან. ტყეში ძველი ქართული ასოებით ქვაზე ამოკვეთილ წარწერას პოულობენ, რომელიც ამცნობს, რომ გზა აღარ უნდა გააგრძელონ. ამის შემდეგ იწყება ბრძოლა ნესტან-დარეჯანის გადასარჩენად.
თრეილერის გადაღება, იდეის ავტორებმა, ორი წლის წინ, სამეგობრო წრესთან ერთად, პირადი სახსრებით დაიწყეს.
„ვეფხისტყაოსნის“ პირველ ეკრანიზაციაში თანამედროვე ქართული კინოს მსახიობები მონაწილეობენ. ფილმის 12 მთავარი გმირიდან ტარიელს - თორნიკე გოგრიჭიანი, ავთანდილს - გიორგი ვარდოსანიძე, ნესტან-დარეჯანს კი - რუსკა მაყაშვილი განასახიერებენ. ვინ ითამაშებს ფრიდონს, თინათინსა და სხვა გმირებს, ჯერ-ჯერობით უცნობია.
ნაწარმოების პერსონაჟებს რეჟისორის მიერ გამოგონილი პესონაჟები დაემატებიან. ზღაპრულ მისტიკური ჟანრის ფილმს კომერციული დატვირთვა ექნება.
