"რადიკალები დაცლილნი არიან აბსოლუტურად ყოველგვარი მორალური ღირებულებებისგან და ეს არაერთგზის გამჟღავნდა მათი მხრიდან, როდესაც ყველაფერს კადრულობენ - შეუძლიათ პირადი ცხოვრების შესახებ ინფორმაციით ერთმანეთს შანტაჟი მოუწყონ, გამოამზეურონ ეს ყველაფერი სააკაშვილთან და სხვა რადიკალებთან დაკავშირებით", - ამის შესახებ "ქართული ოცნების" წევრი, დავით მათიკაშვილი აცხადებს.
დავით მათიკაშვილი გამოეხმაურა პარტია "ფედერალისტების" ლიდერის, თამარ ჩერგოლეიშვილისა და "ერთიანობა - ნაციონალური მოძრაობის" ლიდერების, ანა წითლიძისა და თინა ბოკუჩავას დაპირისპირებას.
სააკაშვილის ამორალური ცხოვრების შესახებ ჩვენ ძალიან კარგად ვიცით და როგორც კი ვინმეს დაჭირდება რადიკალებში, საქართველოს სიძულვილით გაერთიანებული ადამიანები ერთმანეთს არ ინდობენ - ბავშვის ფოტოების გამომზეურებაც შეუძლიათ. შემდგომ ბოდიშის მოხდა ამ ყველაფერს ბუნებრივია, ვერ უწამლის. ეს არის სახე რადიკალებისა, კოლექტიური "ნაცმოძრაობისა" - ერთმანეთში დაპირისპირება.
თქვენ უბრალოდ წარმოიდგინეთ, რაღაც ფორმით ეს ძალა რომ ქვეყნის ხელისუფლებაში კვლავ დაბრუნდეს, რა დღეში ჩააგდებენ საქართველოს და ქართველ ხალხს. ქართველი ხალხი კარგად ამჩნევს, თუ რა ამორალურ, ანტისახელმწიფოებრივ, ანტიქართულ ძალებთან გვაქვს საქმე, როცა ჩვენ ვსაუბრობთ კოლექტიურ "ნაცმოძრაობაზე" - ბოკუჩავებზე, სააკაშვილებზე, ჩერგოლეიშვილებზე და ა.შ. ყველა იმ ადამიანზე რომელიც, საბოლოო ჯამში, ერთ მთლიან რადიკალიზმს წარმოადგენენ ჩვენს ქვეყანაში, დაფინანსებულს გარე ძალებიდან," - აცხადებს დავით მათიკაშვილი.
