უნგრეთის პრემიერ-მინისტრის პრესსპიკერმა, ზოლტან კოვაჩმა სოციალურ ქსელ X-ში დაწერა, რომ ევროკავშირმა უნგრული არასამთავრობო ორგანიზაციები 62 მილიონი ევროთი დააფინანსა.
„ცოტა ხნის წინ გამოქვეყნებულმა ანალიზმა გვიჩვენა, რომ 2014 წლიდან პოლიტიკურად აქტიურმა არასამთავრობო ორგანიზაციებმა, რომლებიც უნგრეთში მუშაობენ, ევროკავშირისგან სულ მცირე 62,4 მილიონი ევროს პირდაპირი დაფინანსება მიიღეს“, - დაწერა კოვაჩმა.
მისი თქმით, ეს მხოლოდ მცირე ნაწილია იმისა, რისი დადგენაც მოხერხდა. კოვაჩის თქმით, მონაცემები ევროკავშირის დაფინანსებისა და ტენდერების პორტალიდან და ფინანსური გამჭვირვალობის სისტემიდან არის აღებული.
„ისინიც კი არ აჩვენებენ სრულ ისტორიას. ეს იმიტომ, რომ არასამთავრობო ორგანიზაციების დაფინანსების სისტემა ევროკავშირში გაუმჭვირვალეა“, - დასძინა მან.
როგორც უნგრეთის პრემიერის პრესსპიკერი წერს, მხოლოდ უკანასკნელ ორ წელიწადში ევროკავშირის პროგრამის „მოქალაქეები, თანასწორობა, უფლებები და ფასეულობების“ გავლით უნგრულმა არასამთავრობო ორგანიზაციებმა, რომლებიც უნგრეთის მთავრობის წინააღმდეგ გამოდიან, თითქმის 13 მილიონი ევრო მიიღეს.
კოვაჩი მის პოსტში პარალელებს ამერიკაში დახურულ USAID-თან ავლებს. მისი თქმით, USAID-ი და ევროკავშირის პროგრამა „მოქალაქეები, თანასწორობა, უფლებები და ფასეულობები“ ერთი და იგივე მიზნით მოქმედებდნენ - სამოქალაქო საზოგადოების დაფინანსების გამოყენება პოლიტიკური ნარატივების ფორმირებისთვის და მთავრობაზე ზეწოლისთვის.
