„ხალხის ძალის“ წევრი დავით ქართველიშვილი საქართველოს პრეზიდენტის, სალომე ზურაბიშვილის ბოლო დროინდელ პოლიტიკურ გადაწყვეტილებებსა და ქცევებს სოციალურ ქსელში ეხმაურება.
როგორც დავით ქართველიშვილი წერს, ჩნდება ეჭვი, რომ სალომე ზურაბიშვილის ქცევა, სულ ცოტა, ნორმალურობის ფარგლებს არის გაცდენილი.
„დასრულდა სალომე ზურაბიშვილის მორიგი ბრიფინგი. ნუ, რა გითხრათ - მსოფლიო პრაქტიკაში ცნობილია რამდენიმე შემთხვევა, როდესაც სახელმწიფო ლიდერების ქცევა (განსაკუთრებით მათი მმართველობის ბოლოს) ეჭვს იწვევდა მათი ფსიქიკური ჯანმრთელობის მდგომარეობიდან გამომდინარე:
რომის იმპერატორი კალიგულა (37–41 წ. ჩვ. წ.) - ცნობილი იყო თავისი ექსცენტრიკულობითა და სისასტიკით, განსაკუთრებით მმართველობის ბოლო წლებში. ისტორიკოსები აღწერენ მას, როგორც პიროვნებას, რომელსაც ჰქონდა დიდების მანიაკური მიდრეკილება. მაგალითად, მან თავისი ცხენი სენატორად გამოაცხადა და მოითხოვა, რომ მისთვის, როგორც ღვთაებისთვის, თაყვანი ეცათ.
ინგლისის მეფე გეორგ III (1760–1820 წწ.) - მას მმართველობის ბოლო წლებში აწუხებდა გონების დაკარგვის ხშირი შეტევები, რომლებიც, თანამედროვე კვლევების თანახმად, გამოწვეული იყო "პორფირიის დაავადებით" და მისი ქცევა სულ უფრო არაპროგნოზირებადი ხდებოდა.
ადოლფ ჰიტლერი (გერმანია, 1933–1945 წწ.), რომელიც მეორე მსოფლიო ომის ბოლო თვეებში იზოლირებულად ცხოვრობდა, ავლენდა პარანოიდულობას და სტრატეგიულად შეცდომებს შეცდომაზე უშვებდა. ზოგიერთი ისტორიკოსის ჰიპოთეზით, მისი ქცევა შეიძლება დაკავშირებულიყო ამფეტამინების მოხმარებასთან, ან პროგრესირებად ფსიქიკურ აშლილობებთან.
აშშ-ის პრეზიდენტი რიჩარდ ნიქსონი (1969–1974 წწ.) - პრეზიდენტობის ბოლო თვეებში, უოტერგეიტის სკანდალის ფონზე, მისი ქცევა სულ უფრო არაპროგნოზირებადი ხდებოდა. ცნობილია, რომ ამ პერიოდში იგი ალკოჰოლს ბოროტად იყენებდა, ავლენდა პარანოიდულობას და გასცემდა უცნაურ ბრძანებებს.
მსგავსი შემთხვევები ხშირად დაკავშირებულია ლიდერების იზოლაციასთან, სტრესთან, ფიზიკურ დაავადებებთან, ალკოჰოლიზმთან, ნარკომანიასთან, ძალაუფლების ბოროტად გამოყენებასთან ან/და ამ ძალაუფლების დაკარგვის მიახლოებასთან“, - წერს დავით ქართველიშვილი.
