9-12 ივნისს, ფინანსთა სამინისტროს შემოსავლების სამსახურმა,    „ცენტრალური აზიის რეგიონალური ეკონომიკური თანამშრომლობის პროგრამის“ წევრი ქვეყნების საბაჟო თანამშრომლობის საბჭოს შეხვედრებს უმასპინძლა.

აღნიშნული ფორუმის ფარგლებში,  12 ივნისს, სასტუმრო ,,პულმანში“, ფინანსთა სამინისტოროს შემოსავლების სამსახურის საბაჟო დეპარტამენტის წარმომადგენლების მონაწილეობითა და ცენტრალური აზიის რეგიონული ეკონომიკური თანამშრომლობის (CAREC), ასევე რეგიონალური ვაჭრობის ჯგუფისა (RTG) და საბაჟო თანამშრომლობის კომიტეტის (CCC) წევრების ორგანიზებით მორიგი ერთობლივი შეხვედრა გაიმართა. ღონისძიების მონაწილეებს მისასალმებელი სიტყვით მიმართა შემოსავლების სამსახურის უფროსის მოადგილემ, ვლადიმერ ხუნდაძემ.

,,სასიხარულოა, რომ გვაქვს შესაძლებლობა ცენტრალური აზიის ქვეყნებთან, ჩინეთთან, მონღოლეთთან და პაკისტანთან ერთად, მრავალმხრივი რეგიონული პლატფორმის ფორმატში, განვიხილოთ ქვეყნებს შორის კანონიერი ვაჭრობის ხელშეწყობისა და საერთაშორისო ვაჭრობაში ჩართული ყველა სუბიექტის წინაშე არსებული გამოწვევები. დღეს, ერთობლივი კომიტეტის მსვლელობისას, გამართული გამოსვლების, დისკუსიებისა და მიდგომების შეჯერებით, მივიღეთ იმის დასტური, რომ საბაჟო ადმინისტრაციების თანამშრომლობის პრიორიტეტები, სრულ თანხვედრაშია ვაჭრობის კომიტეტის პრიორიტეტებთან და მხოლოდ ერთობლივი ძალისხმევითაა შესაძლებელი წარმატების მიღწევა,‘’-აღნიშნა ვლადიმერ ხუნდაძემ და მადლობა გადაუხადა აზიის განვითარების ბანკის გუნდს, ცენტრალური აზიის რეგიონალური ეკონომიკური თანამშრომლობის პროგრამის (CAREC) წარმომადგენლებს, ასევე ვაჭრობის ჯგუფის (RTG) და საბაჟო თანამშრომლობის კომიტეტის (CCC) წევრებს ერთობლივი შეხვედრის საქართველოში ორგანიზებისთვის.

შეხვედრის მსვლელობისას, მხარეებმა CAREC-ის ინტეგრირებული ვაჭრობის (CITA) 2030 დღის წესრიგით, დადგენილი საბაჟოს მოდერნიზების, ვაჭრობის ხელშეწყობის, ასევე სანიტარიული და ფიტოსანიტარიული ზომების, ციფრული ვაჭრობისა და სხვა ინიციატივების დანერგვის მიმართულებით მიღწეული პროგრესი განიხილეს. ამასთან, მხარეებმა,  ვაჭრობის სექტორის 2023 ანგარიში მოისმინეს და 2023-2025 წლების სტრატეგიული სამოქმედო გეგმა  (RSAP) დაამტკიცეს. აღნიშნული სამოქმედო გეგმა 13-14 ივნისს, CAREC წევრი ქვეყნების მაღალი თანამდებობის პირებს სამუშაო შეხვედრის ფარგლებში წარედგინება.

შეხვედრა, რომელიც დიალოგის ფორმატში წარიმართა,  ესწრებოდნენ საბაჟო დეპარტამენტის ხელმძღვანელი, ზურაბ სიჭინავა და საერთაშორისო ურთიერთობათა დეპარტამენტის უფროსი,  სამსონ ურიდია.