თუ „ქართული ოცნება“ შარლ მიშელის დოკუმენტს მნიშვნელოვნად დაარღვევს, მათ მიმართ სანქციები არ დააყოვნებს, - ასე უპასუხა „სტრატეგია აღმაშენებლის“ ლიდერმა გიორგი ვაშაძემ ჟურნალისტების კითხვას, რომელიც აშშ-ის ელჩის, კელი დეგნანის განცხადებას, რომ მოსამართლეების დანიშვნასთან დაკავშირებული პროცესი უნდა შეჩერდეს.

მისივე თქმით, მათ შორის, საქართველო სესხს ვეღარ მიიღებს.

„ღიად და პირდაპირ ვაცხადებ, შარლ მიშელის დოკუმენტი არის ძლიერი იმიტომ, რომ ამ დოკუმენტს ჰყავს ხელმომწერებიც, კონკრეტული ადამიანები, ვინც იცის, რაზე მოვაწერეთ ხელი, კელი დეგნანის, კარლ ჰარცელისა და დასავლელი პარტნიორების სახით. თუ „ქართული ოცნება“ შარლ მიშელის დოკუმენტს მნიშვნელოვნად დაარღვევს, მათ მიმართ სანქციები არ დააყოვნებს. კიდევ ერთხელ გავიმეორებ, რა ტიპის სანქციებზე იქნება პირველ ეტაპზე საუბარი - ეს არის მაკროსაფინანსო მხარდაჭერაზე წინაპირობები და უარი. საქართველო სამწუხაროდ, იღებს ბევრ ვალს. ასეთ სესხებს ვეღარ მიიღებენ, სანამ შარლ მიშელის დოკუმენტი სრულფასოვნად არ შესრულდება“, - განაცხადა ვაშაძემ.

ცნობისთვის, საქართველოში ამერიკის შეერთებული შტატების ელჩის, კელი დეგნანის განცხადებით, ვიდრე სასამართლო სისტემაში ძირეული რეფორმები არ განხორციელდება და აღნიშნულ საკითხზე ფართო მსჯელობა არ გაიმართება, მოსამართლეების დანიშვნა დროებით უნდა შეჩერდეს.

როგორც მან ჟურნალისტებს განუცხადა, სწორედ ეს არის აღნიშნული 19 აპრილის შეთანხმებაში, რაზეც პოლიტიკურმა პარტიებმა ვალდებულება აიღეს.