ოპონენტები არ აღიარებენ და პატივს არ სცემენ სახელმწიფო ინსტიტუტებს, - ამის შესახებ პარლამენტის განათლების კომიტეტის თავმჯდომარემ შალვა პაპუაშვილმა განაცხადა. მისი თქმით, სამწუხაროა, რომ ოპონენტები პრეზიდენტთან ღონისძიებაზე არ გამოცხადდნენ, რაც ყველაზე სიმბოლური დიაგნოზია.

„ეს არის მიზეზიც და შედეგიც, რასაც ჩვენ ვაკვირდებით ბოლო 5-6 თვე, ჩვენი ოპონენტები არ აღიარებენ სახელმწიფო ინსტიტუტებს, პატივს არ სცემენ, ცდილობენ სახელმწიფო ინსტიტუტების დისკრედიტებას. ჩვენი ოპონენტები ფარისევლურად გამოთქვამენ წუხილს, რომ ერთმანეთთან ურთიერთობა უწევთ უცხოელი ფასილიტატორების მეშვეობით და არა საქართველოს პრეზიდენტის თანადგომოთ, რაც იქნებოდა უფრო ორგანული და ბუნებრივი. ის, რომ ისინი დღეს პრეზიდენტის მოწვევის მიუხედავად, არ იყვნენ ამ ღონისძიებაზე, არის სწორედ ამისი ერთ-ერთი მტკიცებულება. პირველ რიგში, მათ პატივი უნდა სცენ სახელმწიფო ინსტიტუტებს“, – განაცხადა შალვა პაპუაშვილმა.

საქართველოს პრეზიდენტმა სალომე ზურაბიშვილმა ორბელიანების სასახლეში დამოუკიდებლობის აღდგენის 30-ე წლისთავისადმი მიძღვნილი მიღება გამართა, რომელსაც პოლიტიკოსები, დიპლომატიური კორპუსის წარმომადგენლები და მიწვეული სტუმრები ესწრებოდნენ.