„ქართული ოცნების“ შემოთავაზება იყო ჰაერი, წყალი, - ამის შესახებ ხატია დეკანოიძემ განაცხადა. „იმედის კვირასთან“ საუბარში „ნაციონალური მოძრაობის“ წევრმა ასევე აღნიშნა, რომ ნიკა მელიას დაკავების ფონზე, ოპოზიციისთვის მოლაპარაკებებში მონაწილეობა რთული იყო.

„როდესაც ჩვენი პარტიის თავმჯდომარე და ოპოზიციის ერთ-ერთი გამორჩეული ლიდერი არის ციხეში და ტყვეობაში, ძალიან რთულია ვისაუბროთ რაიმე კომპრომისზე და ძალიან რთული იყო შეთანხმების მიღწევისთვის მოლაპარაკებებზე მისვლა, მაგრამ ჩვენ სახელმწიფოებრივად მივუდექით ამ საკითხს“, - განაცხადა დეკანოიძემ.

18 მარტს „ქართულ ოცნებასა“ და ოპოზიციას შორის უცხოელი პარტნიორების მედიატორობით გამართული ხანგრძლივი მოლაპარაკებები კონკრეტული შეთანხმების გარეშე დასრულდა. ევროპული საბჭოს პრეზიდენტის, შარლ მიშელის წარმომადგენელმა განაცხადა, რომ კრიზისის გადაწყვეტა დამოკიდებულია საქართველოს პოლიტიკურ ლიდერებზე. კრისტიან დანიელსონმა, რომელმაც ბრიუსელში დაბრუნების გადაწყვეტილება მიიღო, იმედი გამოთქვა, რომ პარტიები სერიოზულად დაფიქრდებიან ვითარებაზე, გასავლელ გზაზე და ექნებათ საჭირო ნება და სურვილი, წავიდნენ კომპრომისზე.