"ქართული ოცნების" თავმჯდომარე ირაკლი კობახიძე აცხადებს, რომ ევროკავშირის წარმომადგენლობის ოფისში „ქართული ოცნებისა“ და ოპოზიციური პარტიებს ლიდერების დღევანდელი შეხვედრა „გადამწყვეტი არაა“.

როგორც მან შეხვედრის დაწყებამდე ჟურნალისტებთან განაცხადა, დღეს, შესაძლო შეთანხმების რამდენიმე პუნქტი იქნება განხილული.

“დღეს პირველი შეხვედრა იმართება ამ ფორმატში ყველა პოლიტიკური პარტიის მონაწილეობით. როგორც ვიცი, დღეს, შესაძლო შეთანხმების რამდენიმე პუნქტი იქნება განხილული. შეხვედრას ველოდებით“,- აღნიშნა კობახიძემ.

ცნობისთვის, ევროკავშირის წარმომადგენლობის ოფისში „ქართულ ოცნებისა“ და ოპოზიციური პარტიებს ლიდერების შეხვედრა მიმდინარეობს. შეხვედრა ევროპული საბჭოს პრეზიდენტის, შარლ მიშელის სპეციალური წარმომადგენლის კრისტიან დანიელსონის მედიაციით იმართება.

ოპოზიციისა და მმართველი გუნდის წარმომადგენლები კრისტიან დანიელსონის ჩართულობით ამ ტიპის შეხვედრაში პირველად მონაწილეობენ.

ხელისუფლებასა და ოპოზიციას შორის მოლაპარაკებებში მედიატორი კრისტიან დანიელსონია, რომელიც ევროპული საბჭოს პრეზიდენტმა შარლ მიშელმა თბილისში საკუთარ წარმომადგენლად დანიშნა. ის საქართველოში 12 მარტს ჩამოვიდა. მას შემდეგ ცალკ-ცალკე გამართა შეხვედრები როგორც ხელისუფლების, ასევე ოპოზიციის წარმომადგენლებთან და არასამთავრობო სექტორთან.