საპატრიარქოს პრესმდივანმა ანდრია ჯაღმაიძემ დეკანოზი გიორგი მამალაძე სასჯელაღსრულების დაწესებულების საავადმყოფოში ინახულა. ჯაღმაიძის განცხადებით, მსჯავრდებულ დეკანოზთან ზეთის ცხების მიზნით იყო შესული.

როგორც ანდრია ჯაღმაიძემ ჟურნალისტებთან საუბრისას განაცხადა, მსჯავრდებულთან საკმაოდ ხანგრძლივი საუბარი ჰქონდა, რომელიც საპატრიარქოს განცხადებასაც შეეხო.

ანდრია ჯაღმაიძე აცხადებს, რომ საპატრიარქოს დეკანოზის შეწყალებაზე უარი არ უთქვამს. მისივე თქმით, აღნიშნული საკითხი მეორე მხარის ქცევაზეა დამოკიდებული, რადგან საპატრიარქო შანტაჟის მცდელობას არ აჰყვება.

"ვისაუბრეთ იმ გარემოებაზე, რაც ბოლო პერიოდში დეკანოზ გიორგის შეწყალების საკითხთან დაკავშირებით განვითარდა. სამწუხაროდ, ზოგიერთმა ტელევიზიამ საპატრიარქოს განცხადების არასწორი ინტერპრეტაცია სცადა, თუმცა თავად მამა გიორგისთვის და მისი ოჯახისთვის სრულიად გასაგებია, რა იგულისხმებოდა. განცხადება ემსახურება პროცესისთვის ნათელის მოფენას. საქმე იმაშია, რომ ერთდროულად მუქარისა და შანტაჟის ტონით საუბრისას საპატრიარქოს მხრიდან მისთვის შეწყალების შუამდგომლობის თხოვნა არის ძალიან ალოგიკური. საკვირველია, როგორ შეიძლება არ ესმოდეთ მის ქომაგებს, რომ ეს ორი რამ შეუთავსებელია. ვფიქრობთ, ეს არის მიზანმიმართული სტრატეგია, რომ რაც შეიძლება დიდხანს შენარჩუნდეს დაძაბული ვითარება და საპატრიარქოს არ მიეცეს შეწყალებაზე შუამდგომლობის დაყენების საშუალება“,-აცხადებს გიორგი ჯაღმაიძე.

მისივე თქმით, ადამიანები, ვის ხელშიც დეკანოზის ოჯახი მძევლად აღმოჩნდა, ცდილობენ, ეს ოჯახი ეკლესიის წინააღმდეგ ხანგრძლივად გამოიყენონ.

დეკანოზი ანდრია ჯაღმაიძე განმარტავს, რომ საპატრიარქოს განცხადების იმ ნაწილში, სადაც მსჯავრდებულის მიერ ბრალის აღიარებაზე იყო საუბარი, საპატრიარქო გულისხმობდა მხოლოდ სულიერ ნაწილს და არა სამართლებრივ მხარეს.

დეკანოზ ანდრიას განცხადებით, ჯერჯერობით გაურკვეველია, მიმართავს თუ არა საპატრიარქო პრეზიდენტს შეწყალების თხოვნით.

"საპატრიარქო როგორც სხვა ჯგუფი ან ორგანიზაცია, გარკვეულ რეკომენდაციას უწევს ამა თუ იმ მსჯავრდებულს. თუ საპატრიარქოს მიმართავენ თხოვნით და შესაბამისი ფორმით, ეს სულაც არ ნიშნავს გარანტიას, რომ კომისია შეიწყალებს ან პრეზიდენტი აპრიორი დაეთანხმება ამ შუამდგომლობას. ჯერ უნდა ამას მიეცეს შესაბამისი ფონი. თუ რამე დარჩათ ეკლესიის წინააღმდეგ სათქმელი, საჩვენებელი ან გამოსაქვეყნებელი, ჯერ ამაში უნდა გავერკვეთ, რა აქვთ, ან აქვთ თუ – არა. ჩვენ ვფიქრობთ, ეს მხოლოდ სპეკულაციაა და საქმე სპეციალურად არის მიყვანილი ჩიხში, რომ დიდხანს იყოს სალაპარაკო”, – აცხადებს ანდრია ჯაღმაიძე.