ვიცე-პრემიერი კახა კალაძე თბილისში მომხდარ სტიქიურ უბედურებასთან დაკავშირებით წერს, რომ ამ ტრაგედიის, ტკივილის აღწერა წარმოუდგენელია.
ენერგეტიკის მინისტრი მადლობას უხდის ყველას, ვინც სტიქიის სალიკვიდაციო სამუშაოებში იყო ჩართული.
„ემოციას დაწერით ვერ გადმოსცემ. წარმოუდგენელია ამ ტრაგედიის, ტკივილის აღწერა... მძიმეა უსუსურობის განცდა, რომ შველა შეუძლებელი იყო... ვუსამძიმრებ ყველას. ვგლოვობ თითოეული დაღუპულის ოჯახთან ერთად...
ჩვენ ყველას გვჭირდება იმედი, რომ იარებს მოვიშუშებთ, ქალაქს ფეხზე დავაყენებთ და ეს იმედია ის საოცარი ერთობა, თავგანწირვა და თანაგრძნობა, რაც გუშინ ღამიდან ჩემს თვალწინ ხდება...
ნეტავ შემეძლოს სათითაოდ მადლიერების და აღფრთოვანების გამოხატვა ექიმების, ძალოვნების, მაშველების, თავშესაფრის თუ ზოოპარკის თანამშრომლების, მოხალისეების, გასაოცარი ახალგაზრდების მიმართ, ვინც ტრაგედიის პირველი წამებიდან თავდაუზოგავად იბრძოდა, ვინც ეხლაც თბილისის ქუჩებში თავის ადამიანურ, პროფესიულ, მოქალაქეობრივ ვალს ასრულებს.
ქვეყნის სიამაყეა ყველა, ვინც სიყვარულით და ერთად დგომით, თავდადებით ებრძვის სიკვდილს და ნგრევას.
ჩვენ ამ იარას მოვიშუშებთ. ჩვენ ყველაფერს დავალაგებთ, თბილისი ისევ ფეხზე დადგება, სამწუხაროდ დაღუპულების გარეშე... სამწუხაროდ დიდი ტკივილით და სინანულით“, - წერს კახა კალაძე.
