საქართველოს ყოფილი პრემიერის, ბიძინა ივანიშვილის შეთავაზებას, რომ შეხვდება სამ ჟურნალისტს, ნინო ჯანგირაშვილი სოციალური ქსელით ეხმაურება:
,,მოკლედ რომ ჩამოვაყალიბო, რა არის ივანიშვილის მიერ სამი არხის სამი ჟურნალისტის დაპატიჟებაში გაუგებარ–მიუღებელი: თუ ერთ კონკრეტულ არხს აძლევ ინტერვიუს, შენი და არხის მოლაპარაკების საგანია, რომელ გადაცემაში და რომელ ჟურნალისტთან ერთად მიიღებ მონაწილეობას. თუმცა, როცა შენ თვითონ წყვეტ, რომელ საათზე და ვინ გინდა, შენგან ინტერვიუ აიღოს და შეტყობინების სახით უგზავნი სამ არხს ინფორმაციას, რომელი ჟურნალისტების ნახვა გესიამოვნებოდა, ეგ უკვე “ჟურნალისტი გამოძახებით“ გამოდის და “გასაოცარ დემოკრატიას“ არ უხდება.
როდესაც სამ არხს არჩევ რეიტინგის მიხედვით, ესე იგი ირჩევ არხს და არა ჟურნალისტს. შესაბამისად, პირობების კარნახი რომელი ჟურნალისტი უნდა მოვიდეს შენთან ინტერვიუზე, გაუმართლებელია და არხმა თვითონ უნდა გადაწყვიტოს, ვის გამოგზავნის.
ამ ისტორიაში კიდევ ბევრი კითხვა და აბსურდია. თუმცა მეზარება ამდენი წერა. ქალბატონ სალომეს დავესესხები და ივანიშვილის მცდელობა ერთმანეთთან “შეტყნას“ ინტერვიუ, გადაცემა, პრესკონფერენცია, არის სულელური წამოწყება და ერთადერთ მიზანს ემსახურება – ერთდროულად დაიპყროს ყველა არხის ეთერი წინასაარჩევნოდ და მიიღოს მაქსიმალური წვდომა მოსახლეობაზე“, – წერს ჯანგირაშვილი.
