დავით ჭიჭინაძის და გედევან ფოფხაძის პარტიაში ყოფნა კი არ არის მნიშვნელოვანი, არამედ ასეთი ტიპის პარტიული ცხოვრება არის მიუღებელი და სწორედ ეს არის მისათითებელი, - ამის შესახებ „ინტერპრესნიუსს“ ექსპერტმა, რამაზ საყვარელიძემ განუცხადა.
საყვარელიძე გამოეხმაურა „ქართული ოცნების“ გადაწყვეტილებას, რომ დავით ჭიჭინაძე “პარტიული დისციპლინის დარღვევის მოტივით „ქართული ოცნებიდან“ გაერიცხათ“.
“ჩვენ ახლაც ვაკვირდებით შიდაპარტიული დაპირისპირების გარკვეულ პროცესს დასავლეთში. კერძოდ, “რესპუბლიკური პარტიის“ ერთი ნაწილი ძალიან უდიერად იხსენიებს დონალდ ტრამპს, პუტინთან მისი შეხვედრის შემდეგ, მაგრამ ტრამპის ან იმათი პარტიიდან გარიცხვის საკითხი, ვინც ტრამპს ცუდად მოიხსენიებს, არ დამდგარა.
პარტია არ არის ადმინისტრაციული ერთეული მათთვის და იმიტომ. პარტია არის ხალხი, რომელიც მხარს უჭერს ერთ იდეას, ამ მხარდაჭერაში პირველი და მეორე პირები, მოხსნა და დანიშვნა, დასჯა და დაჯილდოება არ არსებობს.
ბოლო პერიოდმა შეცვალა ევროპაში ეს პარტიული დამოკიდებულება, რადგან მიხვდნენ, რომ როცა პოლიტიკური სტრუქტურა იერარქიულად არის აწყობილი, შეიძლება მივიღოთ ფაშიზმი. ევროპისთვის ეს მიუღებელია. ამ გამოცდილების ფონზე დასავლეთმა გადაწყვეტა სხვანაირი გაგება და სხვანაირი პრინციპი დაედოთ საფუძვლად პოლიტიკური ცხოვრებისთვის და ეს სხვანაირი ცხოვრება სწორედ იმაში გამოიხატება, რომ არ არსებობს იერარქია და უკან დახევის მექანიზმები.
პარტია არჩევნების წინ ახდენს მობილიზაციას, კრებს მხარდამჭერებს და არსებობს ადმინისტრაციული ჯგუფი, რომელიც ემზადება არჩევნებისთვის. დანარჩენი ცხოვრება სხვანაირია. ჩვენ პარტიულ მენტალიტეტში ხდება რაღაც, რაც ცოტა განსხვავებულია“, - განაცხადა საყვარელიძემ.
მისივე თქმით, ტრადიციებით არიან განმსჭვალური პარტიები საქართველოში, მათ შორის “ქართული ოცნებაც“.
“ლიდერის კრიტიკა საქართველოში არსებულ არც სხვა პარტიებში არ არის. არის თუ არა ეს მისაღები ქართული პოლიტიკური ცხოვრებისთვის, ამის თქმა ცალსახად არ შეიძლება. არსებობენ ანალოგიური პარტიები მსოფლიოშიც, მათ შორის ჩინეთშიც. ეს მომენტი გადამწყვეტი არ არის, მაგრამ თუ ვამბობთ, რომ ევროპას უნდა მივსდიოთ, უნდა დავაკვირდეთ, რომ ეს ასპექტიც არის პარტიული ცხოვრების შემადგენელი“, - აღნიშნა საყვარელიძემ.
რაც შეეხება დავით ჭიჭინაძის საკითხს, საყვარელიძის თქმით, ის შესაძლოა დაბრუნდეს პარტიაში, ან არა, თუმცა მთავარი არის ის, რომ ჭიჭინაძის და გედევან ფოფხაძის პარტიაში ყოფნა-არ ყოფნაში განსხვავება არ არის.
“არ არიან ისინი დიდი მნიშვნელობის პერსონები, მაგრამ სამწუხარო ის არის, რომ პარტიული ცხოვრება უნდა მოეწყოს სხვანაირად. ასეთი სტილის პარტიული ცხოვრება მიუღებელია და ეს არის მისათითებელ-ხაზგასასმელი“, - აღნიშნა რამაზ საყვარელიძემ.
შეგახსენებთ, „ქართული ოცნება - დემოკრატიული საქართველოს“ სამდივნომ პარტიიდან დავით ჭიჭინაძის გარიცხვის გადაწყვეტილება მიიღო.
