ქართული სოფლის მეურნეობა წელს უმოსავლო იქნება. ექსპერტების გათვლით, 35-50 პროცენტით შემცირდება ხორბლის, ყურძნის, ხილისა და ბოსტნეულის რაოდენობა. განსაკუთრებით რთული ვითარებაა ხილისა და ბოსტნეულის მიმართულებით.

ექსპერტები კარგა ხანია აცხადებენ, რომ რომ ცუდი ამინდი რეგიონებში მოუსავლიანობას გამოიწვევს, რაც თავისთავად ბაზარზე ადგილობრივ პროდუქციას გააძვირებს. საფრთხეს ისინი რეალურად მიიჩნევენ. მათი ნაწილის შეფასებით, ასეთი ცუდი მოსავალი საქართველოს არ ჰქონია.

“გვალვა მოსავლიანობაზე ყველა მიმართულებით იქონიებს გავლენას. გვალვა და სტიქიური მოვლენები ხარისხზეც აისახება და მოსავლის რაოდენობაზეც. განსაკუთრებით ცუდად ერთწლიან კულტურაზე იმოქმედებს. როგორც გავიგე, დასავლეთში სიმინდსაც უჭირს. იმერეთსა და გურიაში ერთწლოვანი კულტურები განადგურების პირასაა.

მოსალოდნელია, რომ მოსავალი სერიოზულად შემცირდება. ვფიქრობ, სიმინდისა და ბოსტნეულის საერთო რაოდენობა წლეულს 50%-ით შემცირდება”, - აცხადებს სოფლის მეურნეობის ექსპერტი თამაზ კუნჭულია.

საქართველოს სოფლის მეურნეობა მწირმოსავლიანობას შეჩვეულია, მაგრამ ბოლო წლებში მოსახლეობას იაფი იმპორტი შველოდა. თუმცა, ყვავილოვანი ხელისუფლების პირობებში ტერმინი “იაფი” საერთოდ დავიწყებას მიეცა. ახლა კი ისეთი ვითარებაა, შესაძლოა, საერთოდაც პროდუქციის დეფიციტზე მიდგეს საქმე.

ამის მიზეზი ის გახლავთ, რომ მსოფლიოშიც საერთო მოსავლიანობა მკვეთრად შემცირდა. წლეულს ამ ყველაფერს უამინდობაც დაერთო და პირველად მოთხოვნილების საკვებ პროდუქტებზე ფასები საგანგაშოდ გაზრდილია.

მძიმე კლიმატური პირობების გამო გამო მსოფლიოში ყავის, ჩაის, შაქრის, ხორბლისა და ბრინჯის ფასები გაიზარდა. ეკონომისტების პროგნოზით, ზოგიერთი პროდუქტის ფასის ზრდის ტემპმა, შესაძლოა, ოქროს გაძვირების რეკორდიც მოხსნას.

15%-ით გაძვირდა ბრინჯი, რადგან ჩინეთმა, სადაც ბრინჯის მსოფლიო მარაგების მესამედი მოდის, წყალდიდობის გამო, შესაძლოა, მოსავალი 10%-ით შეამციროს. შაქარი ივლისში 22%-ით უკვე გაძვირდა. თუმცა, ინდოეთში, პაკისტანში, ინდონეზიასა და ფილიპინებში მარაგების ამოწურვის გამო ეს ტენდენცია შესაძლოა გაგრძელდეს.

ყავის ფასმა 12-წლიან მაქსიმუმს მიაღწია. ძვირდება კაკაოც. ჩაის ინდოელი მწარმოებლებიც წვიმის გამო, ფასების ზრდას გარდაუვლად მიიჩნევენ.

ქართველი იმპორტიორების ნაწილი საკვები პროდუქციის გაძვირებას უკვე ადასტურებს. აღსანიშნავია, რომ ყველაზე მეტად მატება ბურღულეულზე შეინიშნება. წინა წელთან შედარებით წიწიბურას ფასი გაორმაგდა და ამ დროისთვის 1 ტომარა 55 ლარს შეადგენს. საცალო ქსელში კი წიწიბურა საოცრად მაღალ ფასად - 2,8 ლარად იყიდება. ბრინჯის ფასმა 20%-ით მოიმატა და ამ მომენტისათვის ერთი ტომარა ბრინჯის ფასი 35 ლარია.